«Երևանի տոները նորմալ կնշվեն այն ժամանակ, երբ քաղաքային իշխանությունները փոխվեն, երբ էս քաղաքի պատասխանատու պաշտոնյաները մտածեն ի շահ ժողովրդի, ոչ թե իրենց գրպանները լցնելու մասին»,- այս մասին «Առաջին լրատվական»-ի հետ զրույցում ասաց քաղաքացիական ակտիվիստ Սուրեն Սահակյանը, որն արդեն 78 օր է՝ քաղաքապետարանի մոտ իր ընկերների հետ նստացույց է անում և պահանջում Երևանի քաղաքապետարանի տրանսպորտի վարչության պետ Հենրիկ Նավասարդյանի և «Երևանտրանս» ՓԲԸ տնօրեն Միսակ Համբարձումյանի հրաժարականները:
«Տոնը փուչիկներն ու պաստառները չեն, որ կախել են, տոնը պետք է հոգուց բխի: Իհարկե, արժե տոնել, իհարկե, մարդկանց ուրախություններ են անհրաժեշտ, բայց տարվա մեջ մի անգամ տոն նշել, մնացած 364 օրը ծանրաբեռնել մարդկանց պրոբլեմներով, որոշումներ կայացնել, որով հարստացնում են օլիգարխներին և կեղեքում են քաղաքացիներին՝ չարժե»,- ասաց Սուրեն Սահակյանը:
Նա նշեց, որ գուցե այն մարդիկ, ովքեր այդ 200 մլն դրամից «փայ ունեն», նրանց համար տոն լինի: Իսկ այս ամենը ոչ թե տոն է, այլ տոնի իմիտացիա է, որովհետև մարդիկ ուրախ չեն:
