Դեռևս չորս տարի առաջ Ցյուրիխի համալսարանի պատմության ֆակուլտետի «Աուլա» սրահում ստորագրվեցին հարաբերությունների զարգացման և դիվանագիտական հարաբերություններ հաստատելու մասին հայ-թուրքական արձանագրությունները: Հայկական կողմից արձանագրությունները ստորագրեց արտգործնախարար Էդվարդ Նալբանդյանը, թուրքական կողմից՝ նրա պաշտոնակից Ահմեդ Դավութօղլուն: Արձանագրությունները ներկայացվեցին երկու երկրների խորհրդարանների վավերացմանը: Արձանագրությունները մինչ այսօր ՀՀ ԱԺ-ի օրակարգում են, իսկ Մեջլիսի օրակարգից անընդհատ հանվում և ետ են բերվում, իսկ գործընթացը դոփում է տեղում:
«Առաջին լրատվական»-ի հետ զրույցում «Հյուսիս-Հարավ» քաղաքագիտական կենտրոնի գործադիր տնօրեն, ռուսաստանցի քաղաքագետ Ալեքսեյ Վլասովն ասաց, որ վերջերս Թուրքիայում է եղել, շփվել է փորձագիտական հանրության հետ հենց այդ թեմայի շուրջ և պարզել է, որ կարծիքները շատ տարբեր են եղել: Ըստ նրա՝ մի շարք փորձագետեր ասել են, որ վաղ թե ուշ այդ գործընթացը կսառեցվի, թեև բանակցային դինամիկա գոյություն կունենա, իսկ մի մասը լիահույս են: Բայց, նրա համոզմամբ, ներկայումս ո՛չ Հայաստանը, ո՛չ Թուրքիան պատրաստ չեն վերադառնալ այն օրակարգին, որը ազդարարվեց այդ պատմական հանդիպման ժամանակ: «Հիմա ես կարծում եմ, որ որևէ փոփոխություն չի լինի, նոր իմպուլս չի լինի այդ հարաբերություններում: Հիմքը, որ հարաբերությունները շարունակվեն, մնում է, ուստի ես կարծում եմ, որ կանխատեսում կարելի է անել կարճաժամկետ ապագայի համար, բայց ինչ կլինի 2014 թ., կանխատեսել հնարավոր չէ»,- ասաց նա:
Գնահատելով ՌԴ դիրքորոշումն այս հարցում՝ Վլասովն ասաց, որ ՌԴ-ն այն կողմերից մեկն էր, որն ապահովում էր Հայաստանի և Թուրքիայի մերձեցումը: Թեև փորձագետը չի բացառում, որ հայ-թուրքական հարաբերություններում ռուսական դիվանագիտության դերն այնքան նշանակալի չէր, որքան Քլինթոնի ներդրած ջանքերը:
«Ես չէի ասի, որ ՌԴ դիրքորոշումն այդ հարցում բացասական է, բայց էլի կասեմ, որ, բնականաբար, այդ հարցում Արևմուտքի դիրքորոշումն ավելի ակտիվ է, այսինքն՝ ՌԴ-ն չի համակարգել այդ կոնֆլիկտն ինչպես ղարաբաղյանի դեպքում, ուստի թեմայի վերականգնման համար նոր օրակարգ է անհրաժեշտ, օրինակ՝ կլինի՞ արդյոք սահմանների բացումը՝ կապված ԼՂ խաղաղ կարգավորման գործընթացի հետ, թե՞ ոչ, և նման մի շարք այլ հարցեր»,- ասաց նա:
