Վահրամ Պետրոսյանի հետ թերթի զրույցում պարզ է դարձել Լիլիթ Հովհաննիսյան և Վահրամ Պետրոսյան զույգի ամուսնության օրն ու փեսայի կոշիկների գույնը:
«Հարսանիքի օրը նշել էինք դեռևս մեկ տարի առաջ, երբ ես և Լիլիթը ամուսնանալու որոշում էինք կայացրել: Այդ օրը Լիլիթն ասաց. «Մեր որոշումը փոխելու համար մեկ տարի ժամանակ ունենք, եթե չփոխեցինք՝ ուրեմն եկող տարվա այս օրը և կամուսնանանք»: Մեր «վերջնաժամկետը» լրանում է հունիսի 29-ին: Այդ օրն էլ կամուսնանանք: Մեր հարսանիքին չեք տեսնելու որևէ կանխատեսելի, ադաթախառն երևույթ: Դեմ չեմ ադաթներին. պարզապես դրանց իմաստի մասին մտածելու ժամանակ անգամ չեմ ունեցել: Իսկ անել մի բան. որի իմաստն էլ չես հասկանում, կարծում եմ՝ հիմարություն է: Մենք որոշել ենք օրիգինալ լինել ոչ թե հանրությանը զարմացնելու համար, այլ «որպեսզի մեր ամուսնության օրը հիշվի յուրաքանչյուր մանրուքով անգամ»:
Թերթի դիտարկմանը, որ և՛ Լիլիթը, և՛ Վահրամը, սիրում են «թիթիզություններ»՝ Վահրամն ասել է. «Մենք սիրում ենք լինել օրիգինալ, տարբերվել։ Ասեմ, որ բավականին երկար ժամանակ փնտրում էի կապույտ, լաքապատ կոշիկներ և այդպես էլ չէի գտնում: Վերջերս Ռուսաստանից եկած իմ ոճաբան ընկերը խոստովանել է, որ կնվիրի ինձ այդպիսի կոշիկներ: Դրանց առանձնահատկությունը հետևյալն է. Մայքլ Ջեքսոնն իր մահից առաջ կապույտ լաքապատ կոշիկների երեք էսքիզներ էր պատվիրել հայտնի ոճաբաններին, սակայն, ցավոք, նա չհասցրեց կրել այդ կոշիկները: Նրա մահից հետո այդ էսքիզներով կոշիկներ կարելու իրավունք էին տվել աշխարհի տարբեր երկրների ճանաչված ոճաբաններին: Եվ իմ ոճաբան ընկերը խոստացել է նվիրել ինձ այդ կոշիկներից մեկը»:
Թերթի հարցին, թե ապագա ամուսինները որտե՛ղ են պատրաստվում անցկացնել իրենց մեղրամիսը, Վահրամը պատասխանել է. «Մեր պլանները խախտեց սեպտեմբերին Վրաստանում կայանալիք «Golden talent» միջազգային երաժշտական մրցույթը, որի հայաստանյան ներկայացուցիչ է ընտրվել Լիլիթ Հովհաննիսյանը: Երկու շաբաթ առաջ Հայաստանում կայացած նախընտրական փուլի արդյունքներով Լիլիթը համարվեց լավագույնը։ Սեպտեմբերի 1-12 կգտնվենք Վրաստանում՝ մասնակցելու այդ մրցույթին»: