«Հատիս»-ի պաշտոնական կայքը տեղեկացնում է, որ երևանյան ակումբի կազմը համալրել են Իվանա Պոդրուգը (Խորվաթիա) և Օլիմպիա Սքոթը (ԱՄՆ): Բարձրահասակ բասկետբոլիստուհիներն արդեն ժամանել են Երևան և նախապատրաստվում են նոյեմբերի 18-ին կայանալիք «Դինամո»-«ԳՈՒՎԴ» մրցավեճին:
«Մեր նորեկները բավականաչափ փորձառու են: Հատկապես մեծ փորձ ունի 34-ամյա Օլիմպիա Սքոթը: Վերջինս հանդես է գալիս կենտրոնականի դիրքում։ Հուսանք, որ նրանք կուժեղացնեն «Հատիս»-ի կազմը,- հարցազրույցում նշում է գլխավոր մարզիչ Գիա Ղազանչյանը։- Արդեն հայտնի է, որ «Դինամո»-«ԳՈՒՎԴ» հանդիպմանը չի մասնակցելու մեր հավաքականի հիմնական կենտրոնական խաղացող Էրիկա Դևիսը: Առանց նրա շատ բարդ կլիներ, և մենք արագ սկսեցինք սելեկցիոն աշխատանքներ»:
