Այսօր փաստաբանները հավաքվել էին քննարկելու «Փասաբանների մասին» ՀՀ օրենքում փոփոխություններ և լրացումներ կատարելու մասին» ՀՀ օրենքի և «Պետական տուրքի մասին ՀՀ օրենքում լրացումներ կատարելու մասին» ՀՀ օրենքի նախագծերը, որոնք լուրջ մտահոգություն են առաջացրել փաստաբանների շրջանում:
Փաստաբանների պալատի նախագահ Արա Զոհրաբյանը նշեց, որ օրենքները դեռ ընդունված չեն, դրանք դեռ նախագծերն են, որոնք տեղադրված են Արդարադատության նախարարության կայքէջում: Այդ օրենքներով նախատեսված է փաստաբանների համար պետական տուրքի վճարում տարեկան 60 հազար դրամ՝ փաստաբանների գրանցամատյան վարելու համար:
Նրա խոսքով`սա նոր հասկացություն է, որը վարելու է Արդարադատության նախարարությունը, և օրենքով համարվելու է, որ գրանցամատյանում գրացված անձն է համարվելու փաստաբան:
Ըստ պալատի նախագահի՝ առաջին մտահոգությունն այն է, որ դա ուղղակիորեն ազդում է փաստաբանի անկախության վրա, որովհետև փաստաբանությունը՝ որպես քաղաքացիական հասարակությաւն ինստիտուտ, անկախ է և պետական մարմինների հետ որևէ կապ չունի: Իսկ օրենքի ընդունման դեպքում պետական մարմինն է որոշում, գրանցամատյանով գրանցելու փաստով, անձին ճանաչել փաստաբան: Այս դեպքում արդեն, նրա խոսքով, գործ ունենք անկախության խախտման հետ:
Երկրորդ մտահոգությունը կապված է պետական տուրքի չափի հետ, քանի որ տարեկան 60 հազար դրամ վճարումը, ըստ Արա Զոհրաբյանի, չհիմնավորված է և ոչ արդյունավետ, քանի որ «Պետական տուրքի մասին» ՀՀ օրենքը նախատեսնում է, որ պետական տուրքը գանձվում է պետական ծառայություններից օգտվող անձնանց համար:
«Այդ օրենքի ընդունումից հետո այդ ծառայությունից օգտվելու է ոչ թե փաստաբանը, այլ հանրությունը և պետական մարմինը: Այստեղ պարադոքսալ վիճակ է ստեղծվում, որ պետական տուրք է սահմանվում փաստաբանների համար, որոնք այդ հաշվառումից չեն օգտվում»,- ասաց նա:
Արա Զոհրաբյանը նշեց, որ Փաստաբանների պալատը հաշվառում իրականացնում է անվճար, հրապարակում տեղեկություններ փաստաբանների մասին:
Այստեղ, նրա դիտարկմամբ, մի կարևոր հանգամանք էլ կա, որ հիշյալ օրենքների նախագծերի հիմնավորման մեջ նշված է, որ այդ գումաները նախատեսվում է ուղղել Հանրային պաշտպանի գրասենյակի պահպանմանը, սակայն Սահմանադրության 20-րդ հոդվածը նախատեսում է, որ օրենքով նախատեսված դեպքերում պետությունն է ապահովում իրավաբանական օգնության անվճար ապահովում: Եվ այս դեպքում փաստաբաններից գումար հավաքելը, ըստ նրա, արդարացված չէ:
Բացի դրանիվ՝ նախագծում հաշվի չի առնված նաև փաստաբանների սոցիալական վիճակը, քանի որ, Արա Զոհրաբյանի խոսքով, մեր 1300 փաստաբանների մի մասը չունի այդ վճարունակությունը:
Պալատի նախագահի կարծիքով` այսպիսով արդարադատության նախարարությունը փորձում է ազդեցություն ունենալ փաստաբանների որոշումների վրա, ուստի փաստաբանները համախմբված են այս հարցի դեմ պայքարելու և թույլ չեն տա, որ այդպիսի բան լինի: Այս քայլը, ըստ նրա, ապակառուցողական քայլ է:
Արա Զոհրաբյանը նշեց նաև, որ երեկ փաստաբանների պալատի խորհրդի նիստ էր, որտեղ որոշվեց ՀՀ վարչապետի հետ հանդիպում կազմակերպել, փորձել հասկանալ` ինչու են փաստաբանների նկատմամբ այսպիսի վերաբերմունք ցուցաբերում:
Լուսանկարը՝ PanARMENIAN Photo-ի
