Գենդերային գաղափարախոսությունը պայքար է, պայքար մարդու դեմ, ֆաշիզմի դրսևորում: Այսօր կայացած մամուլի ասուլիսի ժամանակ այս մասին ասաց Միջազգային իրավապաշտպան, պատմական, հասարակական և քաղաքական գիտությունների դոկտոր, պրոֆեսոր, Հելսինկիի համալսարանի իրավունքի, սոցիոլոգիայի դոցենտ Յոհան Բեքմանը:
Նրա խոսքով՝ գենդերային հավասարության կողմնակիցները իրենց գաղափարները չկիսողներին համարում են աննորմալ: «Նրանք թելադրում են՝ ինչ կերպ մտածենք մենք: Սա գաղափարական պայքար է մեր դեմ, քրիստոնեական արժեքների ոտնահարում:
Սեռային հավասարության քողի տակ իրականում տեղի է ունենում հոմոսեքսուալիզմի և ֆաշիզմի քարոզ, ինչը խիստ վտանգավոր գործընթաց է: Այն մարդիկ, ովքեր պայքարում են ձեր ընտանիքների ու երեխաների նորմալ զարգացման համար, շատ կարևոր գործ են անում»,- ասաց նա:
Յոհան Բեքմանի խոսքով՝ անչափ կարևոր է պահպանել ընտանեկան ավանդական արժեքները:
«Արևմուտքում հոմոսեքսուալությունը մի տեսակ մասնագիտություն է դարձել: Մարդը կարող է լինել հոմոսեքսուալիստ, դրա համար որոշ մարմիններից գումարներ ստանալ, հետո առաջադրվել նախագահի պաշտոնում: Այնուհետև նույն այդ մարդը կարող է դիմել մանիպուլյացիայի՝ ասելով, որ եթե ընտրողներն իրեն քվե չտան, կնշանակի՝ հանդուրժող չեն և չեն հարգում սեռական փոքրամասնության իրավունքները: Անթույլատրելի է, որ ամեն տեղ ընտանեկան դասական արժեքների դեմ քարոզ է տարվում: Դրսի ուժերն ամեն կերպ ուզում են քայքայել ձեր ընտանիքները»,- ասաց եվրոպացի գործիչը:
Ասուլիսի մյուս բանախոս՝ «Համահայկական ծնողական կոմիտե»-ի նախագահ Արման Բոշյանն իր հերթին նշեց՝ հայ հասարակությունը կառավարությանը պետք է հիշեցնի, որ վերջինս իրավունք չունի ընդունել օրենքներ, որոնք կքայքայեն մեր ընտանիքները:
«Պետք է հիշել, որ այդ կառավարությունը աշխատավարձ ստանում է ժողովրդի միջոցներից, նշանակում է՝ երաժշտություն պատվիրողը ժողովուրդն է»,- ասաց նա:
Արման Բոշյանի խոսքով՝ գենդերային հավասարության քարոզի ջատագովները այդպիսին դառնում են համապատասխան կենտրոնների կողմից ֆինանսավորում և գրանտներ ստանալուց հետո:
«Ինչպես է պատահում, որ Հայաստանի ամենահին կոմունիստներից մեկը՝ այժմ արդեն «Համալսարանական կրթությամբ կանանց» կենտրոնի նախագահ Ջեմմա Հասրաթյանը, դարձել է գենդերային հավասարության մոլի քարոզիչ»,- հարց հնչեցրեց նա` հավելելով, որ ոչ ոքի թույլ չեն տա քայքայել հայկական ավանդական ընտանեկան արժեքները:
