Խոսելով երկխոսության շրջանակներում իշխանությունների հետ հնարավոր բանակցությունների օրակարգի մասին՝ «Աոավոտ»-ի հետ զրույցում ՀԱԿ պատվիրակության անդամ Սամվել Աբրահամյանն ասել է, թե Կոնգրեսի օրակարգում, բացի արտահերթ նախագահական և խորհրդարանական ընտրությունների շուրջ բանակցություններից, որևէ այլ հարց չկա:
«Ինչ վերաբերում է դեռ Մարտի 1-ին իշխանություններին ներկայացված 15-կետանոց պահանջներին, որոնք վերաբերում են ոչ միայն սոցիալական ոլորտի, մանր ու միջին գործարարության, գյուղացիության, օրինականության, կոռուպցիայի խնդիրներին, այլև բարձրաստիճան մի քանի պաշտոնյաների պաշտոնանկության և «մարտիմեկյան» զոհերի հարազատներին փոխհատուցում տրամադրելու պահանջներին, ապա դրանք, Ս. Աբրահամյանի պնդմամբ, բանակցությունների առարկա չեն և քննարկման ենթակա չեն»,- գրում է թերթը և մեջբերում. «Դրանք խնդիրներ են, որոնք ենթակա են միայն լուծման: Այդ 15 պահանջներն այնքան ակնհայտ են, որ այնտեղ քննարկելու բան չկա. դրանք պիտի կատարվեն: Դրանք այն առաջնահերթ քայլերն են, որոնք պիտի արվեն երկրի տնտեսական, հասարակական կյանքը «շողուլի բերելու» համար: Հետևաբար՝ այդ առումով զիջումներ լինել չեն կարող: Իսկ արտահերթ ընտրությունները օրակարգի հարց է, որը պետք է քննարկվի: Նրանք էլ (իշխանությունները) իրենց հակափաստարկները կարող են բերել, ու այդտեղ նոր մենք կարող ենք գալ ընդհանուր հայտարարի»:
«Առավոտ»-ի հարցին, թե, այնուամենայնիվ, այդ արտահերթ ընտրությունների օրակարգով բանակցություններում որևէ զիջման Կոնգրեսը պատրա՞ստ է գնալ, թե՞ դա կատարման իմաստով բեկման ոչ ենթակա պահանջ է՝ Ս. Աբրահամյանը պատասխանել է. «Բանակցություններն ինքնանպատակ չեն: Դրանք այսօր Հայաստանում գոյություն ունեցող կոնկրետ խնդիրների՝ քաղաքական ու լեգիտիմության ճգնաժամերի շուրջ են: Հետևաբար՝ խնդիրը, որով մենք գնում ենք բանակցությունների, այս երկու ճգնաժամերը հաղթահարելն է: Ուստի մենք, ընդ որում՝ երկուստեք, պետք է այդ երկխոսությունից, որը բխում է նաև մեր պետության և հասարակության շահերից, դուրս գանք լեգիտիմության խնդիրն ու քաղաքական ճգնաժամը հաղթահարած: Իսկ դրա հաղթահարման ճանապարհը, ինչպես մենք, և համոզված եմ՝ հասարակության մեծամասնությունն է պատկերացնում, նոր և լեգիտիմ իշխանության ձևավորումն է Հայաստանում։ Սա առաջնահերթ խնդիր է, հետևաբար՝ արտահերթ ընտրություններն անխուսափելի են»։
Այնուհետև թերթը տեղեկացնում է, որ պատվիրակության ներկայացուցիչ Վահագն Խաչատրյանը news.am-ի հարցին, թե իշխանության և ընդդիմության՝ տրամաբանորեն հակառակ օրակարգեր ունենալու պարագայում մտավախություն չկա՞, որ երկխոսության գործընթացը դեոևս չսկսված՝ դատապարտված է տապալման, արձագանքել է. «Խորհուրդ կտայի չշտապել, եզրակացություններ չանել և ուղղակի սպասել։ Ի վերջո, մեր նպատակն այս վիճակից դուրս գալն ու համակարգային փոփոխություններ կատարելն է: Այն համակարգը, որով ղեկավարվում է ՀՀ գործող իշխանությունը` փտած է, չի գործում և վատթարացնում է Հայաստանի քաղաքացիների կյանքը: Այնպես որ, այդ երկու հարցերը կարող ենք քննարկել զուգահեռ կերպով, դրանք իրար չեն խանգարի»,- հայտարարեյ է Վ. Խաչատրյանը՝ հույս հայտնելով, որ գործող իշխանությունները քաղաքական կամք և խոհեմություն կցուցաբերեն ու, ի վերջո, կբանակցեն արտահերթ ընտրությունների շուրջ:
