Սեպտեմբերի 2-ին Reuters գործակալությունը հայտնել էր, որ ՌԴ քաղաքացի Արսեն Ոսկանյանը, ով 2016 թվականի նոյեմբերին Կոլումբիայում գերի էր ընկել Ազգային ազատագրական բանակի գրոհայիններին, սպանվել է։
Արսենի հարազատ եղբայրը՝ Արմեն Ոսկանյանը, rusarminfo-ի հետ զրույցում հերքել է Reuters-ի տեղեկությունը՝ նշելով, որ դա հնացած տեղեկություն է, որը ԶԼՄ-ները պարբերաբար հրապարակում են դա սենսացիայի որոնումներով։
«Իմ եղբոր մահը պաշտոնապես հաստատված չէ։ Ոչ ոք մեզ մինչ օրս փաստեր չի ներկայացրել այն մասին, որ նա սպանված է։ Այդ հրամանատարը, որը հայտնել է Reuters-ին եղբորս մահվան մասին, նույնն ասել էր այն բանից հետո, երբ Արսենը փախել էր գերությունից։ Սակայն այնուհետև մեզ հայտնեցին, որ նա ողջ է, և որ նրան որոնելու համար երկինք են բարձրացվել Կոլումբիայի բանակի ուղղաթիռները»,-ասել է Արմեն Ոսկանյանը։
Նրա խոսքով՝ Արսենի որոնումների ժամանակ ապստամբների և Կոլումբիայի բանակի միջև փոխհրաձգություններ են տեղի ունեցել, սակայն որոնումները չեն դադարել։
«Կոլումբիայում ՌԴ դեսպանատունը տեղեկություն չունի եղբորս մահվան մասին։ Այդ իսկ պատճառով մենք չենք կորցնում հույսը, որ նա ողջ է»,-ասել է Արմեն Ոսկանյանը։
