Մեծ Բրիտանիայի արքայազն Հարրին մտադիր է ամուսնանալ իր ընկերուհի Կրեսիդա Բոնասի հետ, հնարավոր է՝ հարսանիքը տեղի ունենա հաջորդ տարի, պնդում է Telegraph թերթը՝ հղում կատարելով երիտասարդների անանուն ընկերներին:
«Կրեսիդա Բոնասը՝ արքայազնի ընկերուհին, վերջնականապես հաղթահարել է իր վախերը… զույգի ընկերները հայտարարել են, որ քննարկվում է հարսանիքի հնարավորությունը: Կրեսին պատրաստվում է ամուսնանալ Հարրիի հետ»,- պարբերականը մեջբերում է սեփական աղբյուրի խոսքերը:
Ընդ որում՝ Հարրին, որը մյուս տարի կդառնա 30 տարեկան, ավելի վաղ հայտարարել է, որ ի դեմս 24-ամյա Կրեսիդայի, ում հետ հանդիպում է մոտ 3 տարի, տեսնում է իր կյանքի ուղեկցին:
Հարրին մինչ վերջերս հայտնի էր որպես երեկույթների սիրահար ու լովելաս: Սակայն, ինչպես նշում է պարբերականը, արքայազնը փոխվել է ու վերանայել կյանքի նկատմամբ հայացքները:
ԶԼՄ-ներն ավելի վաղ գրում էին, որ Կրեսիդան դեռ պատրաստ չէ արքայազնի կինը դառնալու, քանի որ իրեն հետաքրքրում է սեփական կարիերան:
«Հարրին մշտապես խոսում է ընտանիքի ու երեխաների մասին, հիմա Կրեսիդան ևս կողմ է այդ գաղափարին: Ամենայն հավանականությամբ ամուսնությունը տեղի կունենա հաջորդ տարի»,- գրում է Telegraph-ը:
Կրեսիդայի ընտանիքն ուղղակիորեն ազգակցական կապ ունի Մեծ Բրիտանիայի արքա Էդուարդ 7-րդի հետ:
