Մտավախություն կա, որ Վրաստանում նախագահական ընտրություններից հետո կսկսվի ձերբակալությունների ալիք, և արդեն նախկին նախագահ Միխեիլ Սաակաշվիլին ևս կձերբակալվի: Այս մասին հայտարարել է ամերիկացի սենատոր Ջոն Մաքքեյնը «Ամերիկայի ձայն» ռադիոկայանի ռուսական ծառայությանը տված հարցազրույցի ժամանակ:
«Ընտրությունները, որոնք տեղի են ունեցել անցած տարի Վրաստանում, եղել են ազատ և արդար: Վրաստանի նոր վարչապետին մեղադրեցին ռուսամետ տրամադրությունների համար, այդ պատճառով մտավախություն կա, որ կսկսվեն ձերբակալություններ: Հավանական է, որ Սաակաշվիլիին ևս կձերբակալեն: Սակայն անցումային կառավարությունը չի կարող գնալ նման ուղիով: Միաժամանակ, վարչապետը գլուխ է հանում տնտեսությունից, և հենց այդ պատճառով նա դեռևս ձգտում է մոտ լինել ԵՄ-ին»,- ասել է Մաքքեյնը:
Սենատորի խոսքով՝ իրենց ամենաշատն անհանգստացնում է Ռուսաստանի ռազմական հզորությունը և Աբխազիայի ու Հարավային Օսիայի բնակիչներին Ռուսաստանի քաղաքացի դարձնելու փորձերը:
«Ժողովրդավարության ուղին հեշտ չէ, և ինձ շատ է հուզում` արդյոք Վրաստանին կհաջողվի՞ պահպանել հիմնարար հաջողությունները, որը ձեռք է բերել ժողովուրդը վերջին 8-10 տարիներին»,- ասել է նա:
