Շվեդիայում այսօր բացվում է 112-րդ Նոբելյանական շաբաթը: Առաջինը հայտնի կդառնա ֆիզիոլոգիայի և բժշկության ոլորտում մրցանակակրի անունը: Առաջիկա օրերին կհայտարարվեն այլ ոլորտներում դափնեկիրների անունները:
Այսպիսով՝ հոկտեմբերի 8-ին շվեդական մայրաքաղաք Ստոկհոլմում կհայտարարվի ֆիզիկայի, իսկ հոկտեմբերի 9-ին՝ քիմիայի ոլորտում մրցանակակիրների Նոբելյանական հանձնաժողովի որոշումների մասին: Հոկտեմբերի 11-ին Օսլոյում հայտնի կդառնա Խաղաղության Նոբելյան մրցանակակրի անունը:
Նոբելի հիշատակին նվիրված տնտեսական գիտությունների ոլորտում շնորհվող մրցանակակրի անունը հայտնի կդառնա հոկտեմբերի 14-ին: Նշենք, որ այդ մրցանակը հիմնել է Շվեդիայի բանակը՝ 1968 թվականին:
Շվեդական ակադեմիան, որը որոշումներ է ընդունում գրականության ոլորտում մրցանակների շնորհման մասին, դեռևս չի հայտարարել ամսաթվի մասին, սակայն ըստ ավանդույթի՝ գրականության ոլորտում մրցանակակիրների հայտարարման արարողությունը տեղի է ունենում հոկտեմբերի հինգշաբթի օրերից մեկին՝ հիշեցնում է ITAR-TASS-ը:
Իր կտակում Ալֆրեդ Նոբելը ֆիզիոլոգիայի և բժշկության ոլորտում դափնեկրի ընտրությունը հանձնարարել է Ստոկհոլմի Կարոլինյան ինստիտուտին (1810 թ): Դրան կից ստեղծված Նոբելյանական հանձնաժողովը կազմված է 5 մշտական անդամից, ովքեր իրենց հերթին իրավունք ունեն խորհրդակցությունների նպատակով փորձագետների հրավիրել:
Նոբելյանական հանձնաժողովները մինչև վերջին պահը ոչինչ չեն հայտնում հավակնորդերի մասին, սակայն փորձագետները ջանում են սեփական ենթադրություններն անել:
Այս տարի ֆիզիոլոգիայի և բժշկության ոլորտում մրցանակի հավակնորդ են համարվում գերմանացի գիտնական Ինգեբորգ Հոհմայրը, ավստրալացի Գրեմ Կլարկը և ամերիկացի Բլեյք Ուիլսոնը, որոնց հետազոտության արդյունքում ստեղծվել է էլեկտրոնային իմպլանտ, որի շնորհիվ աշխարհում ավելի քան 200 մարդու լսողություն վերականգնվել է:
Մրցանակի կարող են արժանանալ նաև շոտլանդացի Ադրիան Բյորդը, իսրայելցիներ Հաիլ Սեդարը և Ահարոն Ռազինը, ամերիկացի Դևիդ Էլիսը, որոնց հետազոտությունները թույլ են տվել հասկանալ տարբեր գենետիկ հիվանդությունների, այդ թվում քաղցկեղային թարախակույտերի առաջացման պատճառները:
Որոշ փորձագետներ կանխատեսում են, որ բժշկության ոլորտում այս տարի կարող է մրցանակ ստանալ ամերիկացի Դենիս Սլեյմոնը՝ քաղցկեղի մոլեկուլային մեխանիզմների ուսումնասիրման համար: 2012-ին այդ ոլորտում մրցանակակիր էին դարձել ճապոնացի Սինյա Յամանական և բրիտանացի Ջոն Գորդոնը, ովքեր հայտնաբերել էին հասուն բջիջները ցողունայիններում վերածրագրավորելու գործընթացը:
