Գեղարքունիքի մարզի Սոթք գյուղի հյուսիս արեւելյան կողմի խոտածածկ տարածքներում այսօր կեսօրվանից հրդեհ է բռնկվել, որը մարելու համար աշխատել են ՀՀ ԱԻՆ փրկարարական ծառայության Գեղարքունիքի մարզի հրշեջ փրկարարները եւ Սոթք գյուղի մի քանի տասնյակ բնակիչներ՝ գյուղապետարանի անձնակազմի ղեկավարությամբ:
Ինչպես տեղեկացրել է Սոթքի գյուղապետ Կոլիկ Շահսուվարյանը, հրդեհը բռնկվել է խոտածածկ տարածքներում, որը տարածվել է մոտ 200 հեկտար տարածքում եւ ընդգրկել նաեւ սոճու պուրակները, որոնք ընդգրկում են մոտ 7 հեկտար տարածք:
Դրությունը բարդացել է այնքանով, որ մի կողմից հրդեհի տարածմանը նպաստել է քամոտ ու չոր եղանակը, մյուս կողմից էլ թեք ու քարքարոտ տեղանքում հնարավոր չի եղել մոտեցնել ջրցան մեքենաները, ուստի եւ հրշեջ փրկարարներին եւ նրանց աջակցող մարդկանց մնացել է կրակը մեկուսացնել այլ միջոցների գործադրմամբ:
«Այրվեց մոտ 200 հեկտար խոտածածկ տարածք: Կրակը հասավ նաեւ սոճուտներին: Բարեբախտաբար, միահամուռ ուժերով կարողացանք կանխել աղետը, այլապես սոճու անտառները եւս հրո ճարակ կդառնային: Մի 10-15 կիսայրված ծառ ունեցանք, բայց կրակի տարածումը կարողացանք կանխել: Ուղղակի անձնուրաց ձեւով աշխատեցին թե՛ հրշեջները, թե՛ մեր գյուղի երիտասարդները, այլապես վիճակն աղետալի կլիներ: Կրակի դեմ մաքառել ենք հնարավոր բոլոր միջոցներով: Սոճուտները հիմնականում փրկել ենք սոճու թաց ճյուղերի օգնությամբ: Ժամը 19:00-ի դրությամբ կարողացանք մեկուսացնել կրակը: Հավելեմ, որ երկու օր առաջ էլ մեր գյուղում եւս 100 հեկտար խոտածածկ տարածք էր այրվել: Պետք է այսուհետ ավելի աչալուրջ լինենք»,-ներկայացրեց համայնքի ղեկավարը:
