Ադրբեջանական APA լրատվական գործակալության փոխանցմամբ, 2020 թվականից հետո Ադրբեջանում գազի տարեկան արդյունահանումը կազմելու է 50-60 միլիարդ խորանարդ մետր։ Այս մասին հայտարարել է Ադրբեջանի պետական նավթային ընկերության (SOCAR) փոխնախագահի տեղակալ Վիտալի Բեյլերբեկովը։
Նրա խոսքերով, ադրբեջանական գազի արդյունահանման ծավալի մեծացումն իր հետ բերում է այն դեպի արտաքին շուկաներ առաքելու խնդիր, քանի որ այդ ժամանակ Ադրբեջանում ներքին սպառման վրա ծախսվելու է 15 միլիարդ խորանարդ մետր գազ։ «Շահ-Դենիզ» գազային հանքավայրի արդյունահանման երկրորդ փուլի սկսումից հետո գազի արդյունահանումը կարող է հասնել 40 միլիարդ խորանարդ մետրի։
Հիշեցնենք, որ ապրիլի կեսերին SOCAR-ը հայտարարեց, որ Ադրբեջանը ցայժմ համաշխարհային շուկաներ է առաքել 255 միլիոն տոննա նավթ և 22.2 միլիարդ խորանարդ մետր բնական գազ:
Ադրբեջանի նավթային պաշարները գնահատվում են 30 միլիարդ բարել (1 բարելը հավասար է 159 լիտրի), իսկ գազային պաշարները՝ 5-6 տրիլիոն խորանարդ մետր։
