Երեկ քաղաքապետ Տարոն Մարգարյանն անդրադարձել է փողոցների անվանափոխման՝ Երևանի ավագանու «Ելք» խմբակցության առաջարկներին, նշելով. «Մենք կշարժվենք ըստ կարգի, քննարկում կլինի մշտական հանձնաժողովներում: Դա պետք է լուրջ ուսումնասիրվի, պետք է հասարակության կարծիքը լսենք: Որպես քաղաքապետ՝ կարող եմ ասել, որ շտապել պետք չէ: Մենք կողմնակից չենք, որ փոփոխվեն փողոցների անունները: Երևան քաղաքը զարգացող քաղաք է, և մենք ապագայում կունենանք շատ կառուցվող փողոցներ, և հետագայում կնայենք, կուսումնասիրենք, թե մեր մեծերից մասնագետները, քաղաքացիները ում են առաջարկում»,- ասաց նա: Տարոն Մարգարյանը նաև ասել էր, որ պետք չէ պատմությանը ձեռք տալ:
Ի պատասխան՝ Երևանի ավագանու «Ելք» խմբակցության ղեկավար Դավիթ Խաժակյանը «Առաջին լրատվական»-ի հետ զրույցում նշեց, որ փողոցների վերանվանումը պատմության վերարժևորման խնդիր է լուծում:
«Ի վերջո մենք անցյալի ստվերների հետ կռիվ չենք տալիս, մենք ասում ենք՝ եկեք ներկայով գնահատենք՝ ինչ պետք է անենք: Եթե էդպես է, ուրեմն հիմա Հանրապետության հրապարակը պետք է պահպաներ Լենինի անվան հրապարակի անունը»,- ասաց նա:
Հարցազրույցն ամբողջությամբ՝ տեսանյութում:
