Չինաստանը կտրուկ կրճատել է մարդասիրական օգնությունը Հայաստանին, իսկ Շվեյցարիան կտրուկ ավելացրել: Այսպես, այս տարվա առաջին 8 ամիսներին Չինաստանից Հայաստանին հատկացվող մարդասիրական օգնությունը կրճատվել է մոտ 4 անգամ` հասնելով 3 մլն 492.6 հազար դոլարի: Այս ծավալով Չինաստանը հայտնվել է երրորդ տեղում` Հայաստանին մարդասիրական օգնություն հատկացմող երկրների շարքում: Անցած տարվա նույն ժամանակում այս երկրին բաժին էր ընկնում առաջին տեղը և ամբողջ մարդասիրական օգնության ավելի քան 35 տոկոսը: Այս կրճատումը պայմանավորված է նրանով, որ անցած տարի Չինաստանից մարդասիրական օգնության տեսքով ներմուծվել է մեծ ծավալի վերգետնյա տրանսպորտ:
Այս տարի առաջատարը ԱՄՆ-ն է: Առաջին 8 ամիսներին այս երկրից Հայաստան է եկել 8 մլն 655.8 հազար դոլարի ապրանք, ինչն ամբողջ մարդասիրական օգնության ավելի քան 25 տոկոսն է:
Միացյալ նահանգներին հաջորդում է Շվեյցարիան, որտեղից Հայաստան եկող մարդասիրական օգնությունն ավելացել է 2.5 անգամ: Այս երկրին բաժին է ընկնում ամբողջ մարդասիրական օգնության ավելի քան 21 տոկոսը:
Այնուհետև, ըստ օգնության ծավալի գալիս են Գերմանիան, Ֆրանսիան և Միացյալ թագավորությունը: Ընդհանրապես ԵՄ երկրներին բաժին է ընկնում Հայաստանին ամբողջ մարդասիրական օգնության մոտ 27 տոկոսը: Այս երկրներից Հայաստան մարդասիրական օգնության ծավալը մի փոքր նվազել է, իսկ ԱՊՀ-ից ավելացել՝ մոտ 71 տոկոսով: Սակայն չնայած դրան ԱՊՀ երկրներին բաժին է ընկնում ամբողջ մարդասիրական օգնության ընդամենը 2 տոկոսը:
Հայաստանն այս տարվա առաջին 8 ամիսներին ընդհանուր առմամբ 34.1 մլն դոլարի մարդասիրական օգնություն է ստացել, ինչն անցած տարվա նույն ժամանակի համեմատ պակաս է ավելի քան 15 տոկոսով:
