«Ազգային անվտանգություն» կուսակցության նախագահ Գառնիկ Իսագուլյանը երեկ «Առաջին լրատվական»-ի հետ զրույցում ասել էր, թե պատրաստվում է «կլոր սեղանի» շուրջ հրավիրել ոչ միայն Հայաստանի երեք նախագահներին, այլև ԼՂՀ ներկա և նախկին նախագահներին, Պարգև Սրբազանին և Գարեգին Երկրորդին:
ԼՂ նախագահ Բակո Սահակյանի մամլո խոսնակ Դավիթ Բաբայանն «Առաջին լրատվական»-ի հետ զրույցում ասաց, որ Բ. Սահակյանի մասնակցությունն այդ քննարկմանն այնքան էլ տրամաբանական չի լինի. «Այդպիսի հրավեր մենք չենք ստացել, բայց չգիտեմ՝ մեր մասնակցությունն այստեղ ինչքանո՞վ տրամաբանական կլինի:
Չեմ կարծում, թե այդ հարցը պետք է քաղաքականացվի: Մաքսային միությանն անդամագրվելու հարցը չպետք է քննարկեն ներկա և նախկին նախագահները: Հայաստանի ներկա նախագահն իր դիրքորոշումը հայտնել է, իսկ մնացածը պետք է արվի փորձագիտական շրջանակներում: Քաղաքականացնելը, ես կարծում եմ, մի քիչ այնքան էլ ճիշտ չէ»:
Հարիցն՝ դեմ է քաղաքականացնելո՞ւն, թե՞ Բակո Սահակյանի մասնակցությանը, մեր զրուցակիցը պատասխանեց. «Ընդհանրապես սա նշանակում է հարցի քաղաքականացում և առհասարակ՝ Արցախի նախագահն ի՞նչ կարգավիճակում պետք է գա և մասնակցի. նա մեկ այլ պետություն է ներկայացնում: Եկեք ուրեմն բոլոր հարևան պետությունների նախագահներին հրավիրենք այս հարցին մասնակցելու»:
«Ըստ իս՝ ավելի ճիշտ կլինի փորձագիտական շրջանակներում կազմակերպել այդ քննարկումը»,- եզրափակեց նա:
