Այսօր Երևանում տեղի ունեցավ համայնքների գյուղատնտեսական ռեսուրսների կառավարման և մրցունակության ծրագրի վերաբերյալ հանդիպում-քննարկում։ Քննարկմանը մասնակցում էին այդ ծրագրում ընդգրկված և Համաշխարհային բանկի կողմից ընտրած համայնքներից շուրջ 70 մասնակիցներ։ Ծրագիրը ենթադրում է համայնքներում արոտօգտագործողների միավորումների (սպառողական կոոպերատիվների) ստեղծում, որոնք կիրականացնեն համայնքի արօտավայրերի կառավարումը և անասնապահության զարգացումը։
Ծրագիրը նախատեսվում է իրականացնել ՀՀ 6 մարզերի (Արագածոտն, Շիրակ, Լոռի, Տավուշ, Գեղարքունիկ, Սյունիք) 55 համայնքներում։ Ծրագրում ընդգրկված համայնքների այն գյուղացիական տնտեսությունները, որոնք կոոպերատիվներ կստեղծեն, կստանան օժանդակություն մրցակցային դրամաշնորհների տեսքով։
Առաջարկվող ծրագրի տևողությունը 5 տարի է՝ 2011-2016 թթ., նախատեսված ընդհանուր արժեքը 21.33 մլն ԱՄՆ դոլար է, որից 16 մլն ԱՄՆ դոլարը՝ Համաշխարհային բանկի միջազգային զարգացման ընկերակցության (IDA) վարկն է, 3.53 մլն ԱՄՆ դոլարը՝ ՀՀ կառավարության և 1.8 մլն ԱՄՆ դոլարը՝ շահառուների համաֆինանսավորումն է։