«Առաջին լրատվական»-ի զրուցակիցն է «Ժառանգություն» կուսակցության գլխավոր քարտուղար Ստեփան Սաֆարյանը:
– Պարոն Սաֆարյան, Զարուհի Փոստանջյանի՝ Ստրասբուրգում Սերժ Սարգսյանին ուղղված հարցը բավականին մեծ քննարկումների առարկա է դարձել, և Ձեր կուսակիցը հիմնականում քննադատության է ենթարկվում: Դուք ինչպե՞ս կբնութագրեք Զ. Փոստանջյանի այդ քայլը:
– Ես երբեք չեմ մեկնաբանել իմ գործընկերների որոշումներն ու քայլերը, ինքն է իր հարցը կազմել և որոշել հնչեցնել: Մեկնաբանության խնդիր ես չունեմ: Բոլորս էլ հրապարակային գործիչներ ենք, և՛ լավ խոսքեր ենք լսելու, և՛ քննադատություններ ենք լսելու: Այնպես որ, դա էլ արտառոց չեմ համարում: Այնպես չէ, որ քաղաքական գործիչը միայն ծափեր լսելու համար է: Եվ կցանկանայի, որ մարդիկ կոռեկտության շրջանակներում մնային, որովհետև տրվող որակումները դուրս են էթիկայի սահմաններից: Նրանք կարող են չհամաձայնել Զարուհու հայտարարության հետ, կարող են չկիսել Զարուհու արարքը, կարող են ափսոսանք հայտնել, բայց անթույլատրելի է տալ պիտակումներ, որոնք արդեն անձնական բնույթի վիրավորանք են:
– Ձեր կարծիքով` պե՞տք է այդպիսի հայտարարություններ կամ հարցադրումներ հնչեցնել միջազգային նման բարձր ամբիոնից, թե՞ դա կոռեկտ չէ: Դուք նման հարց կհնչեցնեի՞ք միջազգային հարթակներում:
– Եթե դա անվիճելի փաստ է, որի մասին Ս. Սարգսյանին հարցնելու կարիք չկա, ես խնդիր չեմ տեսնում, որտեղ էլ ասես՝ կարելի է հնչեցնել: Բայց եթե դա կասկած է, առնվազն փաստարկ չունեցող տեղեկատվություն, ես ինքս էլ տալու և չտալու խնդիր կունենայի: Իսկ եթե խոսքը ինձ է վերաբերում՝ ես նման հարց կտայի, թե ոչ, եթե ես ստույգ տեղեկություն ունենայի, խնդիր չէի տեսնի հայտարարելու մեջ:
– Իսկ ձեր կարծիքով` Զ. Փոստանջյանի հայտարարությունը ստո՞ւյգ էր, թե՞ ոչ:
– Պիտի սպասել մինչև Զարուհին կգա: Զարուհին կարող է ասել, թե հիմքեր ունեցե՞լ է: Իմ ընկերներն ասում են, թե իրենք նման հարց չէին տա: Ես դա հասկանում եմ այնպես, որ իրենք այդ փաստին չեն տիրապետում: Միգուցե Զարուհին տիրապետում է: Սպասենք ինքը գա պարզաբանի և ներկայացնի իր փաստարկները: Իսկ եթե բարձրագույն ղեկավարությունը գտնում է, որ Զարուհին իրենց զրպարտում է, իհարկե, այդ դեպքում կա դատարան:
– Նման հայտարարություն անելու պատճառով ՀՀ իշխանություններն իրավունք ունե՞ն Զ. Փոստանջյանին հեռացնել ԵԽ ԽՎ պատվիրակության կազմից:
– Ընդհանրապես, որևէ հայտարարության համար իրավունք չունեն այդպիսի բան անել, բայց մի ուրիշ իրավունք ունեն՝ դա պատվիրակության կազմը ձևավորելն է: Եվ իրենք իրենց թույլ են տալիս այլ կերպ ձևավորել: ԱԺ նախագահն է կազմում պատվիրակությունը, և, ցավոք, իմպերատիվ, պարտադիր նորմ չէ այն հանգամանքը, որ խմբակցությունն է ներկայացնում իր ներկայացուցիչներին: Թեև խմբակցություններին տրված է ինչ-որ թեկնածություն ներկայացնելու հնարավորություն, բայց վերջնական որոշումն, իհարկե, ԱԺ նախագահն է կայացնում:
Լուսանկարը` PanARMENIAN Photo-ի
