Հարավային Կորեայի ռազմաօդային ուժերը, ի պատասխան Հյուսիսային Կորեայի կողմից իրականացված հրթիռային արձակման, երեքշաբթի զորավարժություններ են անցկացրել մեկ տոննա կշռով ավիառումբերի կիրառմամբ։ Այս մասին հայտնում է Yonhap գործակալությունը։
F-15K չորս կործանիչներ Mk84 տեսակի ութ ռումբ են նետել թիրախի վրա, որը պայմանականորեն համարվել է հյուսիսկորեական Կանվոնդո նահանգի զորակայանը։ Ռազմաօդային ուժերում հայտարարել են, որ թիրախը հաջողությամբ խոցվել է։
Պետության ղեկավարի վարչակազմի պաշտոնական ներկայացուցիչ Յուն Յոն Չանի հաղորդմամբ՝ վարժանքներն անցկացվել են այն բանից հետո, երբ Կորեայի հանրապետության նախագահ Մուն Չժե Ինը հրամայել է զինվորականներին ի ցույց դնել երկրի զինված ուժերի հզորությունը։
«Գլխավոր հրամանատարը հանձնարարել է Փխենյանին ցույց տալ մեր զինվորականների ռազմական գերազանցությունը»,-ասել է նա՝ հավելելով, որ այդ ողջ հզորությունը գործի կդրվի Հարավի վրա հարձակվելու Հյուսիսային Կորեայի փորձի դեպքում։
