ԵՄ-ի հետ Ասոցացման համաձայնագրի ստորագրումից հետո Ուկրաինային 2014-ին դեֆոլտ է սպառնում: Այս մասին հայտարարել է Ռուսաստանի նախագահի խորհրդական Սերգեյ Գլազևը, ով մասնակցում է Հռոդոս կղզում անցկացվող «Քաղաքակրթությունների երկխոսություն» ֆորումի աշխատանքին: Այս մասին հաղորդում է ITAR-TASS-ը:
«Եվս մեկ անգամ ընդգծում եմ, որ դա (համաձայնագրի ստորագրումը) վերջնական արդյունքում հաջորդ տարի կհանգեցնի Ուկրաինայի դեֆոլտի, քանի որ Ռուսաստանը կդադարեցնի իր վարկավորումը»,- ասել է նա՝ հավելելով, որ այսօր ուկրաինական վճարային հաշվեկշիռը հիմնականում ապահովվում է ռուսական վարկերով ու ռուսական ուղիղ ներդրումներով: Գլազևը հիշեցրել է, որ ռուսական բիզնեսի մասնաբաժինն օտարերկրյա կապիտալի ուղիղ ներդրումներում կազմում է կեսը, 6 անգամ գերազանցում Գերմանիայի մասնաբաժինը:
Եթե այդ ամենը դադարեցվի, ապա դեֆոլտն անխուսափելի է՝ ընդգծել է նա՝ հավելելով, որ դա կհանգեցնի նաև անխուսափելի իշխանափոխության:
«Կգան ուրիշ մարդիկ: Կլինի լուրջ սոցիալական, քաղաքական անկայունություն»,- ասել է նա: Նա նշել է, որ դրանում ամենաքիչն Ուկրաինան է հետաքրքրված: «Դա անհեթեթ համաձայնագիր է բոլոր տեսակետներից: Այն ոչ մեկին ոչինչ չի տա»,- ասել է նա՝ նշելով, որ դա կդադարեցնի Ռուսաստանի հետ Ուկրաինայի ինտեգրումը:
ՌԴ նախագահի խորհրդականի կարծիքով՝ դա շատ թանկ արգելակ կլինի, քանի որ 35 մլրդ եվրո կպահանջվի դեֆոլտից հետո Ուկրաինայի տնտեսությունը կայունացնելու համար: «100 մլրդ եվրո կպահանջվի կարգավորման եվրոպական տեխնիկական նորմերին և ընդհանրապես սանիտարական և անասնաբուժական պահանջներին հարմարվելու համար»,- նկատել է նա:
Նրա խոսքով՝ դա ըստ էության կսնանկացնի ուկրաինական տնտեսությունը:
Գլազևի խոսքով՝ համաձայնագրի ստորագրման դեպքում չեն իրականացվի գազի սակագնի եռակի նվազեցման պլանները՝ մինչև այն մակարդակ, որով այսօր գազ ստանում է Բելառուսը (1000 խորանարդ մետրը՝ 160 դոլար):
«Մենք ծրագրել էինք չեղյալ հայտարարել արտահանման տուրքը: Ընդհանուր առմամբ Ուկրաինան այդ երկու քայլերի հաշվին տարեկան 5.5 մլրդ դոլարի առևտրի պայմանների բարելավում կստանար»,- ասել է Գլազևը: Նրա խոսքով՝ եթե Ուկրաինան վերադառնա Մաքսային միության հետ ինտեգրացիոն գործընթաց, ապա պայմանները կբարելավվեն տարեկան 10 մլրդ դոլարի չափով:
Գլազևի կարծիքով՝ Ռեգիոնների կուսակցությունը կարող է 3- 4 մլն ձայն կորցնել ԵՄ-ի հետ Ասոցացման համաձայնագրի ստորագրման դեպքում: «Որոշումն ընդունվել է առանց Ռուսաստանին նախապես տեղեկացնելու, մեզ փաստի առաջ են կանգնեցրել»,- ասել է նա:
«Ուկրաինական կողմը գործում է շատ անխոհեմ: Դա կարելի է համեմատել Ազարովի կառավարության և ողջ ուկրաինական կառավարության քաղաքական ինքնասպանության հետ»,- ասել է նա:
«Սակայն, ըստ երևութին, կան ինչ-որ գաղտնի զսպանակներ, որոնք ղեկավարում են նրանց շահագրգռվածությունը, որի պատճառը կարող է լինել արտերկրում ունեցվածքը, ինչ-որ կուտակումները, ԵՄ-ի և ՆԱՏՕ-ի կողմից ինչ-որ կերպ դրսևորվող շանտաժը»,- ասել է նախագահի խորհրդականը:
«Ռուս-ուկրաինական հարաբերությունները լրջորեն և տևականորեն կվատանան՝ Կիևի կողմից ԵՄ-ի հետ Ասոցացման համաձայնագրի ստորագրման դեպքում»,- հայտարարել է Գլազևը:
