Թուրքիայում լույս տեսնող հայկական «Ժամանակ» օրաթերթի խմբագիր Արա Գոչունյանը, անդրադառնալով ՀԱԿ-ի և իշխանությունների միջև առկա գործընթացներին, նախապատրաստվող երկխոսությանը, մեզ հետ զրույցում նշեց, որ Սփյուռքը միշտ Հայաստանի ներքին քաղաքական կյանքին հետևում է կառուցողական մոտեցումներով և կառուցողական ակնկալիքներով:
«2008 թվականի նախագահական ընտրություններից ի վեր Հայաստանի ներքաղաքական կյանքում բավականին բարդ իրավիճակ էր առաջացել, և հիմա, բնականաբար, ողջունելի է, որ Հայաստանում թե՛ իշխանությունը, թե՛ ընդդիմությունը այդ կացությունը հաղթահարելու պատրաստակամություն են հայտնում:
Արա Գոչունյանը դրական է համարում Հայաստանի երիտասարդ ժողովրդավարությանը, ժողովրդավարական մշակույթի ամրապնդմանն ուղղված նմանատիպ քայլերը.
«Մեր ակնկալությունն այն է, որ առաջիկա շրջանում այդ երկխոսությունն ունենա դրական արդյունքներ, որոնք Հայաստանի երթը պիտի դրականորեն պայմանավորեն Հարավային Կովկասի նման այնպիսի նուրբ տարածաշրջանում, որտեղ առանց այդ էլ ամեն ինչ բավական դժվար է»:
Արա Գոչունյանը կարծում է, որ ստեղծված դժվարությունները հաղթահարելու համար երկրի քաղաքական ուժերն առավելագույն համախմբվածություն պետք է ցուցաբերեն, որպեսզի, «Հայաստանը կարողանա իր 20-ամյա անկախության երթը ավելի ամուր, ավելի ինքնավստահ քայլերով շարունակել»: