Դիարբեքիր նահանգի Հազրո գյուղում բնակվող Սանիյե Էթքին անունով 76-ամյա քուրդ կինը պարբերաբար ճնշումների է ենթարկվում թուրք ոստիկանների կողմից: «Ակոս»-ի հաղորդմամբ՝ ճնշումների հիմնական պատճառներից մեկը կասկածն է, թե քուրդ կինը կարող է հայ լինել։
Նրա թոռնուհին պարբերականին պատմել է, որ քրդական հարցի նախկին ակտիվիստ հանդիսացող տատի նկատմամբ հազվադեպ կիրառվող ճնշումները հաճախացել են այն բանից հետո, երբ թուրք ուժայիններն իրենց տանը Աստվածաշունչ են հայտնաբերել:
«Տատիկս Ղուրան կարդացող մուսուլման է, բայց Աստվածաշունչ էլ է կարդում: Տան գրադարանում Աստվածաշունչ էլ կա: Ոստիկանները նկատեցին տանը գտնվող Աստվածաշունչը: Այդ դեպքից հետո տատիկիս անընդհատ հարցնում էին «Դու հա՞յ ես: Եթե հայ ես, կարիք չկա թաքցնել, մեզ կարող ես ասել»: Դրանից հետո ոստիկանները գյուղում սկսեցին լուրեր տարածել, թե իբրև տատիկս հայ է և թաքցնում է իր ինքնությունը»,- պատմել է Էթքինի թոռնուհին:
Այդ դեպքից հետո նրանց են այցելել նաև հայերեն խոսող քաղաքացիական հագուստով ոստիկաններ ու փորձել հայերենով հաղորդակցվել տարեց կնոջ հետ:
Հազրոն Դիարբեքիրի՝ PKK-ին աջակցող գյուղերից է, և թուրք ուժայինները այս ու հարակից գյուղերում հաճախ են պարետային ժամ հայտարարում՝ գործողություններ իրականացնելով քուրդ զինյալների դեմ:
