«Վիկիմեդիա Հայաստան» ՀԿ նախագահ Սուսաննա Մկրտչյանն այսօր լրագրողների հետ հանդիպմանը տեղեկացրեց, որ հոկտեմբերի 5-6-ը Երևանում տեղի կունենա միջազգային վիկիկոնֆերանս, որը Հայաստանում անցկացվում է արդեն երկրորդ անգամ: Կոնֆերանսների անցկացման և Վիկիպեդիայում ակտիվության համար հայաստանը ճանաչվել է տարածքային կազմակերպություն:
Հայկական վիկիպեդիայում այժմ հոդվածների թիվն անցել է 97 հազարը, և մենք առաջ ենք անցել մեր հարևաններից:
Ինչ վերաբերում է կոնֆերանսին, ապա բանախոսն ասաց, որ իրենց նպատակն է գիտական հանրությանը ևս ներգրավել այս ոլորտում և սիրողական մակարդակից անցում կատարել գիտականի. «Կոնֆերանսի մասնակիցները երեք հարյուրից ավելի կլինեն, որոնց թվում են տարբեր երկրների ներկայացուցիչներ: Վիկիպեդիան կարծես հայերի համար լինի, որովհետև տարբեր երկրներում հայեր են ապրում և այդ լեզուներով ևս կարող ենք թարգմանել հոդվածները»:
Նա նաև նշեց, որ արդեն վիկիմշակույթը Երևանից դուրս է գալիս, այս տարի «Վիկին սիրում է հուշարձաններ» մրցույթում ներառված է եղել նաև Արցախը:
Ասուլիսի մյուս բանախոսը՝ «Վիկիմեդիա Զերո» Media Viki API և այլ նախագծերի ղեկավար Յուրի Աստրախանը, բարձր գնահատելով Հայաստանում Վիկիպեդիայի առաջընթացը, ասաց, որ իրենք մտադիր են վիկիպեդիան հասանելի դարձնել նաև բջջային հեռախոսներին, քանի որ այսօր անգամ ամենաաղքատ երկրներում հեռախոսները մեծ տեղ են գրավում: