«Ժառանգություն» կուսակցության քարտուղար Ստեփան Սաֆարյանը հիմնազուրկ է համարում ԱԺ նախագահ Հովիկ Աբրահամյանի՝ Զարուհի Փոստանջյանին ԵԽԽՎ պատվիրակության կազմից հեռացնելու որոշումը:
«Չեմ կարծում, որ քաղաքական գործչին իր կարծիքի, իր ելույթի համար կարելի է պարզապես հեռացնել պատվիրակությունից: Եթե ԱԺ նախագահությունը գտնում է, որ Զարուհի Փոստանջյանի ելույթը զրպարտող բնույթ է ունեցել, և Սերժ Սարգսյանին զրպարտել են, իրենք կարող են դիմել դատարան»,-«Առաջին լրատվական»-ի հետ զրույցում ասաց Սաֆարյանը` ավելացնելով. «ԱԺ նախագահի քայլը հիմնազուրկ է: Եթե պատվիրակության անդամին հեռացնելու որևէ հիմք լիներ, ապա ես դա կքննարկեի: Տվյալ պարագայում հիմք չկա»:
Հարցին՝ ԵԽԽՎ-ում հնչեցրած հարցը հիմք չէ՞, Ստեփան Սաֆարյանը պատասխանեց. «Ոչ: Ինչ-որ մեկի կարծիքը, որ դա զրպարտություն է, սուբյեկտիվ կարծիք է, և ոչ ոք նրանց չի խնդրում, որ այդ կարծիքը փոխեն: Հետևաբար սուբյեկտիվ կարծիքի հիման վրա նման քայլ չեն կատարում»:
Հիշեցնենք, որ այսօր ԱԺ նիստում ԱԺ նախագահ Հովիկ Աբրահամյանը հայտարարեց, որ Զարուհի Փոստանջյանը այլևս չի լինի ԵԽԽՎ հայաստանյան պատվիրակության կազմում` հղում անելով ՀՀ Սահմանադրության 66-րդ հոդվածին, համաձայն որի՝ պատգամավորի՝ իր կարծիքն ազատ արտահայտելու իրավունքը սահմանափակված է վիրավորանքի կամ զրպարտության անթույլատրելիությամբ:
