Թուրքական Haberler.com կայքի փոխանցմամբ՝ այսօր բրիտանական The Economist պարբերականում հրապարակվել է Թուրքիայի խորհրդարանական ընտրություններին նվիրված մի հոդված, որը հարուցել է Թուրքիայի վարչապետ Էրդողանի զայրույթը։
Հոդվածում մասնավորապես նշված է. «Հունիսի 12-ին կայանալիք խորհրդարանական ընտրություններում հաղթողի հարցում չպետք է անակնկալներ սպասել։ Եթե Էրդողանի գլխավորած «Արդարություն և զարգացում» կուսակցությունը (ԱԶԿ) ընտրությունների արդյունքներով 550 հոգանոց մեջլիսում ստանա մանդատների 2/3-ը (367), ապա նա կունենա սահմանադրական մեծամասնություն։
Իր իշխանության շուրջ 9 տարիներին ԱԶԿ-ն իսլամական քաղաքականություն է վարել, օրինակ՝ թույլատրել է բուհերում մահմեդական գլխաշորի կրումը։ Միևնույն ժամանակ, Թուրքիայում բավական վատացել է դրությունը մամուլի ու խոսքի ազատության հարցերում։ Ձերբակալված լրագրողների թվով Թուրքիան անգամ գերազանցել է Չինաստանին։ Ոտնահարվում են ազգային փոքրամասնությունների և մասնավորապես քրդերի իրավունքները։
Այս ամենը շարունակվելու է խորհրդարանական ընտրություններում ԱԶԿ-ի հաղթանակից հետո։ Խորհրդարանում սահմանադրական մեծամասնություն ստանալու դեպքում Էրդողանն առաջ է քաշելու Ֆրանսիայում գործող նախագահական համակարգի նման համակարգ և դառնալու է Թուրքիայի նախագահ։
Հիմնական ընդդիմադիր Ժողովրդա-հանրապետական կուսակցության (ԺՀԿ) ներկայիս առաջնորդ Քեմալ Քըլըչդարօղլուն առավել մրցունակ է դարձրել կուսակցությունը՝ այն մաքրելով ԺՀԿ նախկին նախագահ (սեռական սկանդալի պատճառով հրաժարական տված) Դենիզ Բայքալի մարդկանցից։
Թուրքիայի հարավ-արևելյան քրդաբնակ շրջաններում ԺՀԿ-ի նախընտրական հանդիպումներն առավել բազմամարդ են լինում, քան՝ ԱԶԿ-ինը։ Մենք թուրքերին կոչ ենք անում քվեարկել ԺՀԿ-ի օգտին»։
Հիշեցնենք, որ ԺՀԿ-ն իր նախընտրական քարոզչության համար շեշտ դրել է քրդական գործոնի վրա՝ խոստանալով «Քրդական հարցը» լուծել բացառապես ժողովրդավարական կարգով և քրդաբնակ շրջաններում մինչև 2023 թվականը (Թուրքիայի Հանրապետության հիմնադրման 100-ամյակը) ներդնել 365 միլիարդ դոլար՝ ապահովելով 9.5% տնտեսական աճ։
