Ավան և Նոր Նորք վարչական շրջանների ընդհանուր իրավասության դատարանում Սամվել Ուզունյանի նախագահությամբ ընթանում է Նորիկ Մելոյանի գործի դատավարությունը:
Ըստ մեղադրանքի՝ 58-ամյա Նորիկ Մելոյանը 2005-ից 2011 թվականի հոկտեմբերի 1-ն ընկած ժամանակահատվածում, օգտագործելով ՀՀ և ԼՂՀ սահմանների պաշտպանության համար մղված մարտական գործողություններին մասնակից լինելու և այդ ընթացքում վիրավորված լինելու մասին ակնհայտ կեղծ փաստաթղթեր, զինվորական կոմիսարիատում հաշվառվել է որպես զինվորական կենսաթոշակառու:
Նա 2005-ից 2011 թվականների ընթացքում ստացել է 2 միլիոն 729 հազար 203 դրամ՝ որպես զինվորական թոշակ և դրամական օգնություն:
Նույն հիմքով ՀՀ կառավարության 2005 թվականի հունիսի 9-ի թիվ 947/ն որոշման համաձայն՝ Մելոյանը 2010 թվականի հուլիսի 24-ին անհատույց ստացել է 23 միլիոն 327 հազար դրամ գումար պետական ֆինանսական աջակցություն՝ բնակարան գնելու համար:
Ընդհանուր առմամբ, ըստ մեղադրանքի՝ Նորիկ Մելոյանը ՀՀ ՊՆ-ից խաբեությամբ հափշտակել է առանձնապես խոշոր չափերի՝ 26 միլիոն 56 հազար 203 դրամ գումար:
Նորիկ Մելոյանին մեղադրանք է առաջադրվել ՀՀ քրեական օրենսգրքի 178 հոդվածի 3-րդ մասի 1-ին կետով և 325 հոդվածի 1-ին մասով:
Մելոյանի նկատմամբ որպես խափանման միջոց է ընտրվել կալանավորումը:
