«Ժառանգություն» կուսակցության մամուլի խոսնակ Հովսեփ Խուրշուդյանը չի կարծում, թե կուսակցությունը Զարուհի Փոստանջյանի՝ ԵԽԽՎ-ում հարցադրումից հետո ժողով կանի, քանի որ Զարուհի Փոստանջյանը միշտ էլ բավական սուր և կարևոր հարցադրումներ է արել ԵԽԽՎ-ում:
«Ինձ համար մի քիչ տարօրինակ է, բայց մյուս կողմից էլ հատկանշական է, որ Facebook-ում քննադատողների մեծ մասն ասում է, թե ինչու է ԵԽԽՎ հարթակից հնչեցրել այդ հարցը: Զարմանում եմ, քանի որ ԵԽԽՎ-ն թշնամական ճամբար չէ Հայաստանի համար, Հայաստանը ԵԽԽՎ-ում է՝ նաև կիսելով այնտեղ ամրագրված արժեքները և սկզբունքները, որոնցից մեկը հրապարակայնությունն է՝ այն ամենը, ինչ կապված է պաշտոնյաների գործելակերպի և վարքի հետ: Եվ եթե այդ կարգի հարցադրումներ հասարակության մեջ շրջանառվում են և օդում կախված են մնում, մեծ տարբերություն չեմ տեսնում՝ ԱԺ-ում թե ԵԽԽՎ-ում հարցը պետք է հնչի»,- հավելեց նա:
Հարցին՝ արդյոք չե՞ք կարծում, որ դա ոչ թե հարցի պատասխան ստանալու, այլ վարկաբեկելու փորձ էր, Հովսեփ Խուրշուդյանը պատասխանեց, որ հարցերով չէ, որ վարկաբեկվում են իշխանությունները, իշխանությունները վարկաբեկվում են իշխանություն զավթելով, ժողովրդի ձայնը կեղծելով, անընդհատ թալանելով սեփական ժողովրդին և մեծ հարստություններ դիզելով: Դրանցով են, ըստ նրա, վարկաբեկվում իշխող անձինք, նաև՝ նախագահը:
Ըստ նրա՝ ովքեր չեն ուզում արտագաթել, ուզում են այդ հարցերի պատասխանը ստանալ: Նա նշեց, որ իր համար ավելի մեծ մեղադրանք էր հարցի առաջին հատվածը, ինչին, չգիտես ինչու, չեն անդրադառնում:
Ի պատասխան մեր այն դիտարկմանը, թե Facebook-ում շրջանառվում է այն կարծիքը, որ կուսակցությունը պետք է քննարկի նրան մանդատից զրկելու հարցը, Հովսեփ Խուրշուդյանը նշեց, որ իրենց կուսակցությունը չի կարծում, թե որևէ մեկը նման բան գրի, իսկ եթե «Ժառանգության» որևէ անդամ կարծում է՝ խնդիր կա, ապա այն դրվում է վարչության քննարկմանը, խնդիրը գրավոր կամ բանավոր առաջարկում է քննարկել, և կուսակցության յուրաքանչյուր անդամի առաջարկ հարգվում ու քննարկվում է, իսկ հիմա նման հարցադրում չկա արված:
«Մենք լավն էլ անենք, վատն էլ անենք, մեզ մեկ է՝ միշտ քննադատելու են: 91-ից սկսած՝ ամենաշատը թալանած կուսակցությունը և կուսակցականները մենք ենք, խաղամոլ ենք և այլն, դրա համար էլ մեզ պետք է քննադատեն»,- հավելեց նա:
