Грузия Online-ի փոխանցմամբ՝ Վրաստանի ՆԳՆ-ն երկրում կանխել է հերթական ահաբեկչությունը։ Այս մասին հայտարարել է ՆԳՆ ներկայացուցիչ Կոկա Բուխրաշվիլին։
Վերջինիս խոսքերով, Սահմանադրական անվտանգության դեպարտամենտի աշխատակիցներին հաջողվել է Աբխազիային սահմանակից Սամեգրելո շրջանում ձերբակալել Աբխազիայի երկու բնակիչների։
Նրանց մոտ հայտնաբերվել ու առգրավվել է պայթուցիկ նյութ։ Վրացական ՆԳՆ-ը պնդում է, որ նրանց Վրաստան են գործուղել Աբխազիայում տեղակայված ռուսական հատուկ ծառայությունները։
Հիշեցնենք, որ օրեր առաջ Վրաստանի արտգործնախարար Գրիգոլ Վաշաձեն Московские новости պարբերականին տված հարցազրույցի ժամանակ հայտարարել է, որ Վրաստանի նախագահ Միխեիլ Սաակաշվիլին, ինչպես նաև իշխանության այլ ներկայացուցիչներ պատրաստակամություն են հայտնել Ռուսաստանի հետ երկխոսություն սկսել յուրաքանչյուր պահի, յուրաքանչյուր վայրում և յուրաքանչյուր թեմայով.
«Արդյոք Մոսկվան կընտրի երկխոսությա՞ն ճանապարհը, թե՞ կշարունակի Վրաստան առաքել ահաբեկիչներ ու պայթուցիկներ՝ արդեն ես չեմ կարող ասել»։
