Հյուսիսային Կորեայի պահանջներն ԱՄՆ-ի նկատմամբ ՄԱԿ-ի Գլխավոր ասամբլեայի հարթակից հնչեցրել է այդ պետության ԱԳ փոխնախարար Պակ Կիլ Յոնը: «ԱՄՆ-ը սեղմ ժամկետներում պետք է դադարեցնի Կուբայի շրջափակումը: ԱՄՆ-ը պետք է դադարեցնի թշնամական քաղաքականություն վարել և դա պետք է սկսի Հյուսիսային Կորեայի ինքնավարության նկատմամբ հարգանքից, զինադադարի մասին համաձայնագիրը խաղաղության մեխանիզմով փոխարինելուց, որը նախատեսում է «ՄԱԿ-ի հրամանատարության անհապաղ ցրում, բոլոր պատժամիջոցների և ռազմական սպառնալիքների դադարեցում»,- հայտարարել է նա:
Փոխնախարարի խոսքերով՝ Փխենյանի նկատմամբ թշնամական քաղաքականությունից հրաժարվելու դեպքում միայն Կորեական թերակղզում երկարատև խաղաղություն կհաստատվի: Բարձրաստիճան դիվանագետը կոչ է արել ԱՄՆ-ին դադարեցնել Ասիա-Խաղաղօվկիանոսյան տարածաշրջանում աճեցնել ռազմական հզորությունները: Դրանից բացի, ինչպես տեղեկացնում է ITAR-TASS-ը՝ Հյուսիսային Կորեայի ներկայացուցիչը կոչ է արել ցրել ՄԱԿ ԱԽ-ն, քանի որ այն ԱՄՆ-ի համար «ռազմավարական նշանակության նպատակներին հասնելու զենք է ծառայում»:
Հյուսիսային Կորեայի ԱԳ փոխնախարարը նշել է, որ ԱՄՆ-ն իր երկիրը թշնամի է համարում և Հարավային Կորեայի զինված ուժերի հետ ամեն տարի Կորեական թերակղզում զորավարժություններ է անցկացնում, որոնք ուղղված են Հյուսիսային Կորեայի դեմ:
Ընդ որում հույսիսկորեացի դիվանագետը հավատացրել է, որ Հյուսիսային Կորեան հավատարիմ է խաղաղության և Կորեական թերակղզում անվտանգության գաղափարին:
