«Անկասկած, անկախ նրանից, ով կլինի Ռուսաստանի նախագահը՝ Մեդվեդևը, թե Պուտինը, ԼՂ հարցը գոյություն է ունենալու Ռուսաստանի նախագահի արտաքին քաղաքականության օրակարգում»,- «Առաջին լրատվականի» հետ զրույցում կարծիք հայտնեց ռուսաստանցի քաղաքական վերլուծաբան Ալեքսեյ Վլասովը:
Նկատենք, որ կան տեսակետներ, որ ՌԴ ներկայիս վարչապետ Վլադիմիր Պուտինը Միացյալ Նահանգներին խոստացել է նախագահ դառնալու դեպքում լուծել ԼՂ հարցը:
Վլասովի գնահատմամբ՝ շատ հնարավոր է, որ այդ տեղեկություններն արտացոլում են ռուսական քաղաքականությունը Հարավային Կովկասի հետ կապված, սակայն որևէ բան չի ասվում այն մասին, թե ինչպես է որոշվելու այդ հարցը. «Առայժմ նման վերջնական սցենար ստեղծված չէ, միայն ընդգծված է, որ այդ հարցը լինելու է առաջնային, բայց չի ասվում, թե կոնկրետ ինչպես է այն լուծվելու»:
Ըստ Վլասովի՝ այստեղ Երևանին և Բաքվին ուղերձ կա, հասկացնելու համար, որ Ռուսաստանը չի նվազեցնի իր մասնակցությունն ու ներկայությունը ԼՂ հարցի լուծման գործընթացում. «Բայց այդ մեսիջը կարելի է տարբեր կերպ կարդալ, քանզի այն ընդհանուր առմամբ դիվանագիտական խաղի տարր է»:
Ռուսաստանցի քաղաքական վերլուծաբանի խոսքերով, ակնհայտ է, որ Ռուսաստանն այժմ աշխատում է իր ձեռքում կենտրոնացնել կոնֆլիկտի վերահսկողության հիմնական լծակները. «Հասկանալի է, որ 2011-2013 թթ. լինելու են բեկումնային ոչ միայն Ղարաբաղի և հայ-ադրբեջանական հակամարտության, այլ նաև հարավկովկասյան քաղաքականության իրականացման առումով, մասնավորապես կապված Վրաստանում Սաակաշվիլիի պաշտոնավարման ժամկետի ավարտի հետ»:
