Չնայած ԲՀԿ-ն ԱԺ ամբիոնից այդպես էլ չհայտարարեց գլխավոր դատախազի թեկնածու Գևորգ Կոստանյանի թեկնածության վերաբերյալ իր դիրքորոշման մասին, ԲՀԿ-ականները այսօր պարտաճանաչ ներկայացան քվեարկության ու կողմ քվեարկեցին Կոստանյանի թեկնածությանը: Բացի այն, որ ԲՀԿ-ականներն ասում էին, որ դա խմբակցության որոշումն է, որոշ ԲՀԿ-ականներ թերևս տարբեր պատճառներ ունեն նոր գլխավոր դատախազի հետ լավ հարաբերություններ ստեղծելու:
ԲՀԿ-ական պատգամավոր Կարո Կարապետյանը (Յուվեցի Կարո) առաջինն է գնացել ընտրելու: Մեր հարցին, թե ինչպես է քվեարկել, նա պատասխանեց. «Կողմ՝ Կոստանյանին»: Երբ հետաքրքրվեցինք, թե ինչի համար է կողմ քվեարկել, ԲՀԿ-ական պատգամավորը պատասխանեց. «Որովհետև ես իրան շատ հարգում եմ, և ինքը պրաֆեսիոնալ իրավաբան ա, երկիրը կկառուցի»: Ի պատասխան մեր հարցին, թե հնարավո՞ր է դատախազին կողմ լինելու պատճառը նաև այն է, որ իր դեմ քրեական գործ կա սառեցված, և միգուցե ուզում է լավամարդ լինել՝ Կարապետյանը հայտարարեց. «Չէ, ոչ մի բան իմ նկատմամբ չկա: Ես իրան հարգում եմ՝ որպես փայլուն իրավաբանի: Իմ կարծիքով՝ միակ անձնավորությունն է, որ դատախազությունում ամեն ինչ կվերափոխի ու ճիշտ կկազմակերպի»: Ասել է թե՝ Ձեր կարծիքով, մինչ այժմ դատախազությունը ճիշտ չի՞ աշխատել՝ եզրակացրինք մենք: «Ես չեմ կարա ասեմ՝ ճիշտ չի եղել»,- զգուշացավ ԲՀԿ-ականը:
Մեր հիշեցմանը, թե կարծիք հայտնելն իր իրավունքն է, Կարապետյանը պատասխանեց. «Դուք ասում եք՝ ում եք ընտրել դատախազ, ես ասւմ եմ՝ Կոստանյանին և առաջինն եմ ընտրել»: Հիշեցրինք, որ իր դեմ, այնուամենայնիվ, կար կարճված գործ, ինչին ի պատասխան՝ ԲՀԿ-ականն ասաց. «Իմ դեմ քրեական գործ չկար, է: Հանցագործը պիտի պատժված լիներ, բայց չի պատժվել»:
Հիշեցնենք, որ 2009-ին Երասխ-Երևան ավտոճանապարհին ԱԺ պատգամավոր Կարո Կարապետյանն իր ավտոմեքենայում վեճի էր բռնվել Դվին գյուղի բնակիչ, Արարատի մարզպետարանի աուդիտոր Արթուր Զադոյանի հետ, որի ընթացքում Արթուր Զադոյանը երկաթյա ձողով (ավտոմեքենայի համարանիշ ամրացնելու բանալիով) հարվածել էր Կարո Կարապետյանի գլխին, որն էլ իրեն ամրակցված «Բրաունինգ» տեսակի ատրճանակով 5 անգամ կրակել էր Արթուր Զադոյանի ուղղությամբ: Փամփուշտներից երկուսը դիպել էին Զադոյանի աջ ուսին և աջ ոտքին: Այնուհետև նաև ծեծի էր ենթարկել նրան. Զադոյանը ոտքերի հարված էր ստացել գլխին, որը դարձել էր ուղեղի ցնցման պատճառ, վնասվել էին նաև նրա կողերը: Զադոյանը, բարեբախտաբար, ողջ էր մնացել, նա տեղափոխվել էր «Էրեբունի» բժշկական կենտրոնի վերակենդանացման բաժին և 3 վիրահատության ենթարկվել: Նշեք, որ Կարո Կարապետյանը հայտարարել էր, թե Արթուր Զադոյանն է իրեն դարանակալել և ցանկացել հաշվեհարդար տեսնել` իրեն ունեցած 57 հազար դոլար պարտքը չտալու նպատակով: Պատգամավորի հետ կապված գործը բավական աղմուկ հանեց, սակայն առավել ուշագրավ է գործի քննությունը. Կարո Կարապետյանն այդպես էլ այս գործով ո՛չ մեղադրյալ, ո՛չ տուժող չճանաչվեց: Ավելին՝ սկզբում երկուսն էլ սույն գործով անցնում էին որպես վկա, հետո Արթուր Զադոյանին, որը բարեբախտության շնորհիվ էր պատգամավորի կրակոցների արդյունքում ողջ մնացել, ներգրավեցին որպես մեղադրյալ: Իսկ ավելի ուշ կասեցրին գործի վարույթը, որը վերսկսելու վերաբերյալ Արթուր Զադոյանի դատական բողոքները ոչ մի արդյունք չտվեցին:
