Սեպտեմբերի 30-ին ՀՀ ԱԺ փոխնախագահ Հերմինե Նաղդալյանը հանդիպել է Հայաստանում գենդերային հավասարության հարցերով ԵԱՀԿ հատուկ ներկայացուցիչ Ջուն Զեյթլինի հետ:
Հանդիպման ընթացքում կողմերն անդրադարձել են Հայաստանում գենդերային հավասարության խնդիրներին, օրենսդրությանը:
Տիկին Զեյթլինը նշել է, որ այս այցելության ընթացքում մի շարք հանդիպումներ է ունեցել պետական գործիչների, հասարակական կազմակերպությունների ներկայացուցիչների հետ:
Հերմինե Նաղդալյանը նշել է, որ ՀՀ-ում գենդերային հավասարության ուղղությամբ կատարվել են դրական փոփոխություններ: Նրա խոսքով` այժմ աճում է կանանց թիվը պետական կառույցներում, տարածքային և տեղական ինքնակառավարման մարմիններում:
Այսօր ԱԺ-ում կին պատգամավորները 14-ն են՝ պատգամավորների 10 տոկոսից ավելին: Նրանցից 9-ը ՀՀԿ խորհրդարանական խմբակցության անդամներ են, որոնցից 2-ը ընտրվել է մեծամասնական ընտրակարգով: Կառավարության կազմում 2 կին նախարար կա: Նաև մոտ 24-25 գյուղական համայնքներ ղեկավարում են կանայք: Ընդ որում, դրանք հիմնականում սահմանամերձ և փախստականներով բնակեցված համայնքներ են՝ սոցիալական և կենցաղային խնդիրներ ունեցող:
Տիկին Նաղդալյանը նշել է, որ պետությունը ստանձնել է պարտավորություն՝ մինչև 2020 թվականը ավելացնել կանանց ներգրավվածությունը տեղական ինքնակառավարման մարմիններում,հատկապես ավագանիում: Այս գործընթացը շարունակվելու է նաև օրնեսդիր և գործադիր մարմինններում: Տիկին Նաղդալյանն ավելացրել է, որ «Կանանց և տղամարդկանց հավասար իրավունքների և հավասար հնարավորությունների ապահովման մասին» օրենքի շուրջ կազմակերպվել են բազմակողմանի քննարկումներ մարզերում և լսումներ խորհրդարանում: Փոխնախագահի կարծիքով՝ պիտի ստեղծել ազգային մեխանիզմ, բարձրացնել կրթական մակարդակը, և այդ դեպքում օրենքը կդառնա լիարժեք գործող:
Կողմերը քննարկել են նաև գենդերային հավասարության ռազմավարական փաստաթղթերը: Տիկին Նաղդալյանը նշել է, որ ՀՀ ընդունել է «Կանանց և տղամարդկանց հավասար իրավունքների և հավասար հնարավորությունների ապահովման մասին» օրենքը, կանանց դիրքերի բարելավման ազգային ծրագիր և հայեցակարգ: