Կիրակի օրը Սուրբ Երրորդություն եկեղեցում ԱԺ պատգամավոր Սամվել Ալեքսանյանի որդիների կնունքի արարողության ժամանակ մարդկանց մուտքը եկեղեցի արգելվել է, որպեսզի չխաթարվի դիզայներների աշխատանքը: Այս մասին «Առաջին լրատվական»-ին ասացին Արարատյան հայրապետական թեմի մամլո դիվանից` ավելացնելով, որ բաց է եղել եկեղեցու հարավային դուռը, որտեղից հավատացյալները ևս կարող էին մտնել եկեղեցի. «Խնդիրը մամուլում միակողմանի է ներկայացվել: Փակված է եղել եկեղեցու գլխավոր մուտքը, որպեսզի դիզայներների աշխատանքը չխաթարվի, բայց բաց է եղել եկեղեցու հարավային մուտքը, որտեղից հավատացյալները կարողացել են մտնել և նույնիսկ մասնակցել մկրտության արարողությանը»:
Մեր հարցին, թե դիզայներների աշխատանքը մատնանշելն արդյոք արդարացնո՞ւմ է եկեղեցի մարդկանց չթողնելը, կրկին նույն պատասխանը եղավ, որ դուռն ընդհամենը փակվել է, որ դիզայներները կարողանան ավարտել իրենց աշխատանքը:
Կատարվածի հետ կապված՝ փորձեցինք զրուցել նաև վերջերս մեծ աղմուկով Սուրբ Երրորդություն եկեղեցի տեղափոխված Տեր Հակոբի հետ, սակայն նա առանց մամլո դիվանի թույլտվության չարտահայտեց իր կարծիքը ԱԺ պատգամավորի վարքի և եկեղեցու դռները մեկ անձի պատճառով մարդկանց առաջ փակելու վերաբերյալ:
Չխոսեց նաև Էջմիածինը: «Դա Արարատյան թեմի ենթակայության խնդիր է»,- եղավ պատասխանը: