Բնակարան գնելու համար, եթե չկա դրա համար անհրաժետ գումարն, առաջին օգնության են գալիս հիփոթեքային վարկերը: Իսկ դրանք ավելի մատչելի դրաձնելու համար գործում է Ազգային հիփոթեքային ընկերությունը, որը բանկերին և վարկային կազմակերպություններին է տրամադրում ցածր տոկոսով և երկարաժամկետ վարկեր: Իսկ ովքե՞ր են հիմնականում օգտվում հիփոթեքային վարկավորումից:
Նախ վարկառուների ավելի քան 2/3-րդ տղամարդիկ են: Ըստ Ազգային հիփոթեային ընկերության ուսումնասիրության վերաֆինանսավորված հիփոթեքային վարկերի 72 տոկոսը տղամարդկանց անունով է, իսկ կանանց բաժին է ընկնում ընդամենը 28 տոկոսը: Ե’վ կանայք, և’ տղամարդիկ հիփոթեքային վարկ են վերցնում հիմնականում բնակարան գնելու համար: Այս նպատակին է բաժին հասնում 63 տոկոսը, փոքր մաս`36 տոկոս, են կազմում բնակարանի վերանորոգման համար վարկ վերցնողները, իսկ ամենաքիչը կառուցապատման համար վարկեր վերցնողներն են` 1 տոկոս:
Հիփոթեային վարկ վերցնելու համար պետք է ունենալ բավական բարձր աշխատավարձ: Սա նորություն չէ: Բայց Ազգային հիփոթեքային ընկերության ուսումնասիրությունը հստակեցնում է վարկի չափերը: Ըստ ընկերության տվյալների վարկատուների գրեթե կեսի աշխատավարձը 200-400 հազար դրամի սահմանում է: Վերաֆինանսավորված հիփոթեքային վարկերի 42 տոկոսը բաժին է ընկնում հենց նրանց: Ինչ վերաբերում է մինչև 200 հազար դրամ աշխատավարձ ստացողներին, ապա նրանց բաժին է ընկնում ընդամենը 16 տոկոսը:
Տեսակարար կշռով երկրորդ տեղում 400-600 հազար դրամ աշխատավարձ ստացողներն են` 21 տոկոսով: Իսկ ավելի բարձր աշխատավարձ ստացողները, կարծես թե, նախընտրում են հիփեթեքային վարկ չվերցնել բնակարան գնելու կամ նորոգելու համար: Այսպես, ամսական 600-800 հազար դրամ ստացողներին բաժին է ընկնում միայն 10 տոկոսը, 800 հազարից 1 մլն դրամ ստացողներին՝ 5 տոկոսը, իսկ 1 մլն-ից ավելի ստացողներին` ընդամենը 6 տոկոսը:
