Նրան անվանում են մոլորակի ամենագեղեցիկ կին, կանացիության իդեալ, դերասանուհի-աստվածուհի, որի մեջ համադրվել են գեղեցկությունն ու ներքին ուժը՝ նրան դարձնելով ոճի ու նրբագեղության մարմնացում:
Այսօր իտալացի դերասանուհի Մոնիկա Բելուչին տոնում է իր ծննդյան օրը:
«Ռուսկայա գազետան» ներկայացնում է հետաքրքիր փաստեր Մոնիկա Աննա Մարիա Բելուչիի կյանքից:
Դերասանուհին ծնվել է 1964թ. սեպտեմբերի 30-ին Իտալիայի Չիտտա դի Կաստոլլո բնակավայրում: Մոնիկան ընդունվել է Պերուջայի համալսարան, դրան զուգահեռ՝ 16 տարեկանից սկսել է աշխատել «Էլիտ» մոդելային գործակալությունում:
24 տարեկանում նա գնում է Միլան, որտեղ 1 տարում կարիերայի բարձունքներին է հասում, նկարահանվում համաշխարհային առաջատար ամսագրերի համար, դառնում Դոլչե-Գաբանայի դեմքը:
«Երբ ես 15-16 տարեկան էի, միշտ փորձում էի ապացուցել, որ խելք ունեմ, հիմա ինձ համար միևնույն է: Եթե ուզում եք մտածել, որ ես հիմար եմ, մտածեք: Դա ձեր խնդիրն է: Բոլորին չես գոհացնի», – մի անգամ լրագրողներին ասել է Բելուչին:
1990թ. 26-ամյա դերասանուհին ամուսնանում է լուսանկարիչ Կլաուդիո Կառլոս Բասսոյի հետ. այդ ամուսնությունը տևում է 4 տարի:
Բելուչին սկսել է կինոյում նկարահանվել 1990-ից: Այս ժամանակից ի վեր նա խաղացել է 56 ֆիլմում:
«Ինձ հեշտ են տրվում տեսարանները, որտեղ ես առանց հագուստի եմ: Մերկությունը մաքուր է, դրանում ինչ-որ կախարդական բան կա»,- խոստովանել է Բելուչին:
1996թ. նա ստանում է «Սեզար»՝ «Բնակարան» ֆիլմում դերակատարման համար, որպես «Լավագույն երիտասարդ դերասանուհի»: Կինոնկարահանման ժամանակ նկարահանման հարթակում բուռն սիրավեպ է սկսվում նրա ու ֆրանսիացի դերասան Վենսան Կասելի միջև: Զույգն ամուսնանում է 1999թ.: 2000-2001 թթ. լույս է տեսնում երկու կուլտային ֆիլմ նրա մասնակցությամբ: «Մալենա»-ում դերը նրան մեծ ճանաչում է բերում և ամրապնդում տաղանդավոր դերասանուհու դիրքերը:
2000-ականներին նրա մասնակցությամբ գրեթե ամեն ֆիլմ դառնում է կուլտային:
Բելուչիի առաջին երեխան ծնվեց նրա 40-ամյակից 2 շաբաթ առաջ: 2010թ. մայիսին 45-ամյա դերասանուհին երկրորդ դուստրն ունեցավ: Օգոստոսին հայտնի դարձավ, որ ամուսիններն ամուսնալուծվում են:
Ներկայումս Բելուչին նկարահանվում է կուլտային ռեժիսոր Էմիր Կուստուրիցայի ֆիլմում:
