«Իրատես դե ֆակտո» ակումբում այսօր Հայ ազգային կոնգրեսի ներկայացուցիչ Դավիթ Շահնազարյանը պատասխանելով լրագրողների հարցերին, որոնք առնչվում էին Դովիլում ընդունված համանախագահող երկրների ղեկավարների համատեղ հայտարարությանը և Կազանում սպասվող հնարավոր զարգացումներին, նկատեց, որ Դովիլի հայտարարությունից ուղղակի բխում է, որ կողմերը խուսանավելու տեղ չունեն. «Կարծես թե համանախագահողները վստահ են, որ Սերժ Սարգսյանի հետ խնդիր չեն ունենալու, բայց վստահ չեն, որ առայժմ խնդիր չեն ունենալու Իլհամ Ալիևի հետ: Բայց նրանց հնարավորությունները մեծ են: ԼՂ կարգավորման հարցը հիմա ոչ այնքան տարածաշրջանային անվտանգության կոնտեքստում է ընթանում, հիմա կարծես թե գլոբալ անվտանգության խնդիրներից է դարձել, գուցե ոչ առաջնահերթը, բայց այդ համակարգի անքակտելի մաս է կազմում»,- նշեց նա:
Սոչիի համաձայնությունը ավելի հայանպա՞ստ է, թե՞ադրբեջանամետ, հարց ուղղեցին լրագրողները Դ.Շահնազարյանին, ով նկատեց, որ երկու երկրներում էլ հայտարարությունները առավելապես պրոպագանդայի արդյունք են. «Ակնհայտ է, որ որևէ փաստաթուղթ չի կարող լինել ոչ պրոհայկական, ոչ պրոադրբեջանական: Փաստաթուղթը չենք տեսել, իսկ թե ինչ տեղեկություններ ունեմ այդ փաստաթղթի մասին՝ դա այլ հարց է: Կլինի փաստաթուղթը՝ կգնահատենք: Ակնհայտ է, որ երեք կողմերի ղեկավարների համար էլ ցանկացած նման փաստաթուղթ լինելու է շատ ծանր, առավել ծանր է լինելու այդ փաստաթուղթը մատուցել այն կողմի համար, որը առավել ռադիկալ դիրքերից է հանդես եկել: Թե՛ Սերժ Սարգսյանը, թե՛ Ալիևը հանդես են եկել ռադիկալ դիրքերից հատկապես ներքին պրոպագանդայի առումով, բայց հանուն արդարության պետք է նշել, որ Ի.Ալիևին այդ իմաստով՝ իր ռադիկալիզմով, իր ոչ ադեկվատ գործողություններով, չի կարելի համեմատել Ս.Սարգսյանի հետ»:
Դ.Շահնազարյանը նշեց նաև, որ չնայած համանախագահող երեք երկրների ղեկավարները կոնկրետ փաստաթուղթ են նշել իրենց հայտարարության մեջ, բայց չի բացառվում, որ դրանում էլ մանևրելու տեղեր կլինեն. «Բայց դրանից հետո սկսվելու է շատ ավելի կարևոր փուլ՝ խաղաղության պայմանագրի վրա աշխատանքը, որը արդեն լինելու է կոնկրետ փաստաթուղթ և հիմնական ծանր աշխատանքը լինելու է այնտեղ»:
