Հայաստանի Հանրապետության Ազգային ժողովի ՀԱԿ խմբակցության պատգամավոր Նիկոլ Փաշինյանը սեպտեմբերի 30-ին ԱԺ նախագահից փորձեց ճշտել՝ Հայաստանի գլխավոր դատախազը վերջին անգամ երբ է հաղորդում ներկայացրել ԱԺ, եթե եղել են տարիներ, երբ չի ներկայացրել, որն է պատճառը: Փաշինյանը դա հայտարարեց հակասահմանադրական, ինչին ԱԺ նախագահ Հովիկ Աբրահամյանը հակադարձեց, որ համամիտ չէ այդ կարծիքին:
«Այն, որ Սահմանադրությունը խախտվել է, համամիտ չեմ, դա ձեր կարծիքն է, որ հնչեցնում եք, դրա իրավունքն ունեք: Ես պետաիրավական հարցերով մշտական հանձնաժողովի նախագահի առջև այդ հարցը բարձրացրել եմ, նշել եմ, որ գլխավոր դատախազը պետք է հաշվետվություն ներկայացնի: Դրան ես կողմնակից եմ, ամեն ինչ անելու եմ, որ նա ներկայացնի հաշվետվություն»,- ասաց նա: Խորհրդարանի խոսնակը տեղեկացրեց, որ դեռևս չի եղել դեպք, որ գլխավոր դատախազն ԱԺ-ին հաշվետվություն ներկայացնի: Պատճառը, ըստ նրա, կանոնակարգ-օրենքի ոչ հստակ ձևակերպումն է:
Փաշինյանը նկատեց, որ օրենքում հստակ ձևակերպված է՝ Գլխավոր դատախազը պետք է հաշվետվություն ներկայացնի Ազգային ժողովին: Պատգամավորը նաև հայտարարեց, որ անազատության մեջ պահվող Տիգրան Առաքելյանը քաղբանտարկյալ է, ինչը բարկացրեց ԱԺ նախագահին: Նա Փաշինյանին խորհուրդ տվեց իրեն գլխավոր դատախազի լիազորություններ չվերագրել և մեղադրանքներ չհնչեցնել: «Ինձ մոտ այնպիսի տպավորություն է, որ դուք խոսում եք խոսելու համար»,- ասաց նա:
