ԲՀԿ նախագահ Գագիկ Ծառուկյանը համառորեն խուսափում է որևէ անհատական հայտարարություն անել Հայաստանի՝ Մաքսային միությանն անդամակցելու սեպտեմեբերի 3-ին կայացրած որոշման կապակցությամբ: Փոխարենը նրա կուսակիցները անդադար մատնանշում են սեպտեմբերի 2-ին արված վերջինիս ոչինչ չասող ելույթը Ֆիզիկական կուլտուրայի պետական ինստիտուտի նոր ուսումնական տարվա մեկնարկի առթիվ: Գուցե Ծառուկյանը սպասում է «պապայի» խոսքին: Հայաստանի երկրորդ նախագահ Ռոբերտ Քոչարյանի գրասենյակի ղեկավարը մի քանի շաբաթ է հայտարարում է, որ Քոչարյանն առաջիկայում հանդես է գալու հարցազրույցով, որտեղ անդրադառնալու է սեպտեմբերի 3-ին Մոսկվայում արված հայտարարությանը: Ծառուկյանն էլ հավանաբար որոշել է առաջ չընկնել:
Չի բացառվում նաև, որ ԲՀԿ առաջնորդը տվյալ պարագայում արտաքին քաղաքական այս խնդիրը համարում է, որ իր խելքի բանը չէ և դրա մասին մեկնաբանությունները թողել է Սերժ Սարգսյանին և Ռոբերտ Քոչարյանին:
Գագիկ Ծառուկյանը նույնիսկ Բիձինա Իվանիշվիլիին շնորհավորելու, ազատամարտիկների հետ «ընդդիմադիր» օրակարգ մշակելու համար է ժամանակ և խոսքեր է գտնում, իսկ ահա Հայաստանի Մաքսային միությանն անդամակցելու որոշման վերաբերյալ խոսք ու ժամանակ նա համառորեն չի գտնում: Մյուս կողմից՝ զարմանալի էլ չէ, որ Ծառուկյանը խուսափում է խնդրո առարկայի մասին հրապարակային դիրքորոշումից: Այստեղ հարցն այն է, որ Ծառուկյանն, ըստ էության, իրենից ոչինչ չի ներկայացնում՝ Հայաստանում իշխանական դաշտում կայացվող որոշումների առումով: Սա նշանակում է, որ եթե ԲՀԿ առաջնորդը որևէ հայտարարություն անի, ապա այդ հայտարարությունը կամ պետք է շատ վերացական լինի, ինչը, ըստ էության, ավելի ծիծաղելի կլինի, կամ պետք է լինի շատ կոնկրետ: Իսկ կոնկրետության դեպքում, Ծառուկյանի «խոսքը գործ է» տարբերակով նա պետք է հետամուտ լինի հայտարարությանը: Բայց ինչպես հետամուտ լինել, եթե Ծառուկյանը գործնականում որևէ ազդեցություն չունի Հայաստանում որոշումների կայացման գործընթացի վրա, հետևաբար նրա համար միանգամայն անհայտ է, թե ինչպես կզարգանան առաջիկայում ԵՄ-ի կամ Մոսկվայի հետ Հայաստանի գործերը, և ինչ պատասխանատվության տակ կմնա իր «խոսքը»: Այս իսկ պատճառով Ծառուկյանը ներկայումս իր գործն է դարձրել լռությունը՝ հայտնի ֆիլմի հայտնի ֆրազի ոգով՝ «որ իմանամ ինչ եք ուզում որ ասեմ՝ կասեմ, որ չգիտեմ ինչ եք ուզում ասեմ՝ ի՞նչ ասեմ»: