Արարատի և Վայոց Ձորի մարզերի ընդհանուր իրավասության դատարանում Գագիկ Սարգսյանի նախագահությամբ ընթանում է Վաչիկ Ազատյանի գործի դատական քննությունը:
Արարատ քաղաքի 33-ամյա բնակիչ Վաչիկ Ազատյանը, ըստ մեղադրանքի, 2013 թվականի մարտի 18-ին, գիշերվա ժամը 1-ին Արարատի մարզի Նոր Կյանք գյուղի բնակիչ Վ. Խուդաթյանի տուն է ապօրինի մուտք գործել՝ դուռը հրել-բացելու միջոցով:
Վաչիկի նպատակը գումար ու ոսկեղեն գողանալն էր՝ համաձայն առաջադրված մեղադրանքի: Սակայն իր կամքից անկախ հանգամանքներով պայմանավորված՝ Վաչիկը գողությունն ավարտին չի հասցրել:
Տանտերը ձայներից արթնացել է, դուրս եկել բակ:
Գող՝ սիրտը դող. Վաչիկը հասկացել է, որ նկատվել է տանտերերի կողմից: Նա դուրս է նետվել տնից, ցատկել բետոնե պարսպի վրայով, որպեսզի ճողոպրի, սակայն տանտերը արդեն փողոցում էր ու ճարպկորեն բռնել է նրան:
Մի կերպ ազատվելով վրդովված Խուդաթյանի ձեռքից՝ Վաչիկ Ազատյանը, այնուամենայնիվ, փախել է դեպքի վայրից: Սակայն շուտով բռնվել ու մեղադրվել է գողության փորձ կատարելու համար՝ ՀՀ քրեական օրենսգրքի 34-177 հոդվածի 3-րդ մասի 1.1 կետով:
Ազատյանն այլևս ազատ չէ, նրա նկատմամբ խափանման միջոց է կիրառվել կալանավորումը:
