Իրանը հաստատել է իրանա-արգենտինյան փոխըմբռնման հուշագիրը՝ հետաքննելու 1994-ին Բուենոս-Այրեսի հրեական մշակութային կենտրոնում տեղի ունեցած պայթյունը: Այս մասին Նյու Յորքում հայտարարել է Արգենտինայի ԱԳ նախարար Էկտոր Տիմերմանը՝ հաղորդում է արգենտինական Telam գործակալությունը:
Արգենտինան իր պատմության մեջ ամենախոշոր ահաբեկչության մեջ մեղադրում է մի շարք բարձրաստիճան իրանցիների, այդ թվում՝ նախկին նախագահ Հաշեմի Ռաֆսանջանիին և կառավարության 7 նախկին պաշտոնյաների: Իրանի իշխանությունները մշտապես կտրականապես հերքել են մեղադրանքները: 2013-ի սկզբին Արգենտինայի և Իրանի իշխանությունները հուշագիր են ստորագրել՝ պայմանավորվելով պայթյունի համատեղ հետաքննություն անցկացնել, սակայն, ըստ արգենտինական կողմի, Իրանը դեռևս պատրաստակամություն չի ցուցաբերել համագործակցության առումով:
Արգենտինայի ԱԳ նախարարը հայտարարել է, որ Իրանը հաստատել է փաստաթուղթը, և 2 պետություններն էլ հույս ունեն, որ «համաձայնագրի բոլոր կետերը կյանքի կկոչվեն»: Տիմերմանի խոսքերով՝ այդ համաձայնագիրը կյանքի կոչելու համար նոյեմբերի առաջին կեսին կմշակվի «ճանապարհային քարտեզ»:
Հուշագիրն արդեն հավանության է արժանացել Իրանի պաշտպանության ազգային խորհրդի կողմից և սպասում է երկրի գերագույն առաջնորդ այաթոլլա Խամենեի ստորագրությանը:
