Վրացական News Georgia կայքի փոխանցմամբ՝ Թբիլիսիի քաղաքապետարանը սկսել է հասարակական տրանսպորտի կայանատեղիներում էլեկտրոնային ցուցանակների տեղադրման աշխատանքները։ Այս մասին հայտարարել է քաղաքապետարանի մամլո ծառայությունը, որի տարածած հաղորդագրության մեջ նշված է.
«Քաղաքապետարանը ողջ քաղաքում ձեռնամուխ է եղել քաղաքային տրանսպորտի ժամանակակից էլեկտրոնային ցուցանակների տեղադրմանը։ Դրանք մայրաքաղաքի բնակիչներին ու հյուրերին հնարավորություն կընձեռեն ճշգրիտ իմանալու իրենց անհրաժեշտ ավտոբուսների ժամանման ժամկետը։
Սկզբնական փուլում նախատեսված է 20 էլեկտրոնային ցուցանակի տեղադրում։ Մինչև օգոստոսի վերջը դրանց քանակը կհասցվի 450-ի, որոնք առաջին հերթին կտեղադրվեն ուղևորներով հագեցված կանգառներում»։
Հիշեցնենք, որ օրեր առաջ Սաակաշվիլին հայտարարել էր, որ Թբիլիսին պետք է դառնա Եվրոպայի լավագույն մայրաքաղաքներից մեկը. «Դա մեր առաջնահերթ խնդիրն է: Թբիլիսին պետք է բնակության համար հարմարավետ քաղաք դառնա:
Հաճախ դժգոհություններ են լսվում, որ ավտոբուսների քանակը կրճատվել է, և մարդիկ ստիպված են լինում երկար կանգնել կանգառներում: «Ես ինքս մեծացել եմ այս քաղաքում և լավ հիշում եմ, թե ինչպիսի դժվարությամբ էի տնից հասնում դպրոց: Այսօր մենք Թբիլիսիում ունենք մի քանի անգամ ավելի շատ ավտոբուսներ, քան կոմունիստների ժամանակ էր:
Այսօր մենք Թբիլիսիում ներդնում ենք ժամանակակից տրամվայ, որը չունի ո՛չ Բուդապեշտը, ո՛չ էլ Եվրոպայի որևէ այլ քաղաք: Մենք Թբիլիսի ենք բերում նաև էկոլոգիապես մաքուր այլ տրանսպորտ, ինչպիսին է, ասենք, հեծանիվը, որքան էլ դա ոմանց համար կարող է զավեշտալի թվալ»: