Ամերիկացի սենատոր Ջոն Մակքեյնը CBS News հեռուստաալիքի ուղիղ եթերով հայտարարել է, որ խորապես հիասթափված է ՄԱԿ-ի Անվտանգության խորհրդում Սիրիայի հարցով քվեարկության արդյունքներից: Մակքեյնի հիասթափության գլխավոր պատճառն այն է, որ Սիրիայի քիմիական զենքի հարցով ընդունված բանաձևում չի նշվում, թե ինչ է սպասվում «Սիրիային այն դեպքում, եթե երկիրն իր քիմիական զենքը չհանձնի միջազգային վերահսկողությանը:
«Ռուսաստանը միշտ կրկնել է, որ չի աջակցի Սիրիայի դեմ լուրջ պատժամիջոցներին, որոնք կկիրառվեին պարտավորվածությունների չկատարման դեպքում: Նման պահանջներ չկան: Միակ պահանջը քննարկումներին վերադառնալն է ՄԱԿ-ի Անվտանգության խորհրդում»,- ասել է սենատորը:
Նրա խոսքերով՝ Սիրիական ազատ բանակի մարտական ոգին ընկել է, ընդդիմությունն իրեն լքված է զգում:
Մակքեյնի կարծիքով՝ ՄԱԿ-ի ԱԽ-ը համաձայնագիր է կնքել, որը ոչ մի պատիժ չի սահմանում 1400 մարդու մահվան համար, որոնք սպանվել են զարին գազով:
