ԱՄՆ Կոնգրեսը 410 կողմ և 6 դեմ ձայներով ընդունել է Վրաստանի տարածքային ամբողջականությանն աջակցող բանաձև:
Օրինագծում նշված է, որ ԱՄՆ նախագահ Դոնալդ Թրամփը պետք է կոչ անի Ռուսաստանին զորքերը դուրս բերել Վրաստանից, Ուկրաինայից, Մոլդովայից և սահմանների վերահսկողությունը վերադարձնի այդ երկրներին:
ԱՄՆ Կոնգրեսը քննարկելու է Ռուսաստանի դեմ նոր պատժամիջոցների մասին օրինագիծը: Նոր օրինագծում բաժին կա՝ նվիրված «Եվրոպայում և Եվրասիայում ռուսական ազդեցությանը դիմակայելու» խնդրին:
Կոնգրեսը հաստատել է նաև 2018 ու 2019 ֆինանսական տարիներին «Ռուսական ազդեցությանը դիմակայելու հիմնադրամի» ֆինանսավորումը 250 միլիոն դոլարի չափով:
Արդյոք Հայաստանը այն երկրների թվո՞ւմ է, որտեղ ԱՄՆ-ը ստուգելու է Ռուսաստանի ազդեցությունն ընտրությունների վրա: Տեսականորեն՝ այո, գործնականում՝ ոչ, որովհետև, ինչքան էլ պարադոքսալ հնչի, Ռուսաստանն այսօր, մեծ հաշվով, Հայաստանի ընտրական գործընթացի վրա ազդելու անհրաժեշտություն չունի. Մոսկվան Հայաստանում այդ հարցը գլոբալ լուծել է 1999թ.-ի հոկտեմբերի 27-ին, որից հետո Հայաստանում ձևավորվել է խիստ վերահսկելի քաղաքական համակարգ, որը ոչ միայն հլու-հնազանդ կատարում է Մոսկվայի հանձնարարությունները, այլև հաճախ հենց ինքն է իր ծառայություններն առաջարկում Կրեմլին:
Այսինքն՝ Հայաստանում Մոսկվայի ազդեցությունը տոտալ է, որը չի սահմանափակվում ընտրական գործընթացով, ավելի ճիշտ՝ ընտրություններում արտացոլվում են հայ-ռուսական վասալային հարաբերությունների հետևանքները, և եթե նույնիսկ սահմանափակ քաղաքական ուժեր ընդվզում են դրանց դեմ, ապա այն սահմանափակվում է բացառապես ներքաղաքական դիսկուրսով:
Եթե Վաշինգտոնը ցանկանում է մեղմել ռուսական դեստրուկտիվ ազդեցությունը Հայաստանում, ապա պետք է նպաստի «Հոկտեմբերի 27»-ով հաստատված հայ-ռուսական հարաբերությունների և դրանից ածանցյալ Հայաստանի ներքաղաքական ստատուս քվոյի վերանայմանը:
Մյուս կողմից՝ անիմաստ է այս հարցում ակնկալել ամերիկյան աջակցություն, եթե Հայաստանում ձևավորված չէ ընդդիմություն, որի օրակարգային հիմնական հարցը Հայաստանի ապագաղութացումն է։ Հայաստանի կողմնորոշված հասարակությունը հենց սա է ակնկալում «Ելք» դաշինքից: Հայաստանում հնարավոր չէ ձևավորել իրական այլընտրանք՝ առանց հստակ արտաքին կողմնորոշման:
