Մալայզիայի բնակիչ Ֆահմի Ֆաձիլը, որը հայտնի հասարակական գործիչ է այդ երկրում, 100 անգամ պետք է ներողություն խնդրի BluInc Media հրատարակչությունից, որը Ֆաձիլին մեղադրում էր զրպարտության մեջ: Ընդ որում՝ Ֆաձիլը դա պետք է անի Twitter միկրոբլոգերի կայքի իր էջում: Այսպիսին է եղել երկու կողմերի համաձայնության գալու նախապայմանը: Այս մասին հաղորդում է Associated Press գործակալությունը:
Գործակալության հաղորդմամբ՝ 2011 թ. սկզբին ֆաձիլն իր միկրոբլոգում գրել էր, որ իր հղի կնոջը շատ վատ են վերաբերվում կանացի ամսագրի աշխատակիցները, որտեղ նա աշխատում է: Ամսագիրը պատկանում է BluInc Media հրատարակչությանը:
Շուտով հրատարակչության իրավաբանները նամակ են հղել մալայզիացուն՝ մեղադրելով նրան զրպարտության մեջ: Ի վերջո կողմերը հաշտություն են կնքել՝ Twitter-ում 100 անգամ ներողություն խնդրելու դիմաց:
