ԱՄՆ նախագահ Բարաք Օբամայի և Իրանի նախագահ Հասան Ռուհանիի հեռախոսային զրույցը կայացել է իրանական կողմի նախաձեռնությամբ: Այս մասին հայտնել է Սպիտակ տան ներկայացուցիչը՝ փոխանցում է ITAR-TASS-ը: Նրա խոսքով՝ զրույցը եղել է ջերմ և տևել է 15 րոպե:
Սպիտակ տան ներկայացուցիչը հիշեցրել է, որ Օբաման ցանկացել էր անձամբ շփվել իրանցի գործընկերոջ հետ Նյու Յորքում ՄԱԿ-ի Գլխավոր ասամբլեայի ժամանակ, սակայն հանդիպումը չի կայացել դրա կազմակերպման հետ կապված խնդիրների պատճառով:
Զրույցի ժամանակ երկու երկրների առաջնորդները վճռականություն են արտահայտել՝ կարգավորելու իրանական միջուկային խնդիրը խաղաղ ճանապարհով՝ հայտնել է ամերիկյան վարչակազմի ներկայացուցիչը:
Ռուհանիի հետ հեռախոսազրույցի մասին առաջինը հայտնել է Օբաման անձամբ՝ Սպիտակ տանը լրագրողների հետ հանդիպմանը: Նա հայտարարել է, որ հնարավոր է համարում միջուկային հարցի կարգավորումը, չնայած դրա ճանապարհին խոչընդոտները քիչ չեն:
«Փաստն առ այն, որ դա ամերիկացի ու իրանցի նախագահների առաջին շփումն էր՝ սկսած 1979 թվականից, խոսում է երկու երկրների միջև խորին անվստահության մասին, սակայն այն մատնանշում է նաև այդ բարդ պատմության հաղթահարման հնարավորությունը»,- նկատել է ԱՄՆ նախագահը: Նրա խոսքով՝ այդ հարցի լուծումը կարող է մեծ քայլ լինել ԱՄՆ-ի ու Իսլամական Հանրապետության միջև նոր՝ փոխադարձ շահերի ու հարգանքի վրա հիմնված հարաբերությունների ճանապարհին:
