Ցանկալի է ՀՀ-ԵՄ համագործակցության ապագա պայմանագրային բազայի ուրվագծումն ավարտին հասցնել Վիլնյուսին ընդառաջ: «Առաջին լրատվական»-ի հետ զրույցում այս մասին ասաց ԵՄ ընդլայնման և եվրոպական հարևանության քաղաքական հարցերով հանձնակատար Շտեֆան Ֆյուլեի օգնական Պիտեր Ստանոն` անդրադառնալով Երևանի և ԵՄ-ի միջև ներկայումս ընթացող երկխոսությանն ու ՀՀ-ԵՄ համագործակցության հնարավոր ձևաչափերի մշակմանը:
Նա վերահաստատեց Ֆյուլեի հայտնած միտքն այն մասին, որ ԵՄ-ն մտադիր է շարունակել իր քաղաքական համագործակցությունը Հայաստանի հետ այն մակարդակով, որը համապատասխանում է Հայաստանի հավակնություններին: Իսկ ավարտին հասցնել Ասոցացման համաձայնագիրը, որի շուրջ իրենք բանակցել են Հայաստանի հետ, նրա պնդմամբ, հնարավոր չի լինի, քանի որ այն համատեղելի չէ ՄՄ-ին միանալու Հայաստանի ցանկության հետ: Սակայն Պիտեր Ստանոն նաև նկատեց, թե չափազանց վաղ է հայտարարել «Արևելյան գործընկերության» վիլնյուսյան գագաթնաժողովում հնարավոր փաստաթղթի ընդունման մասին:
«Բայց ակնհայտ է, որ մեզ անհրաժեշտ է սկսել ուրվագծել պայմանագրային ապագա բազան՝ Հայաստան-ԵՄ համագործակցության համար, որը համատեղելի կլինի Հայաստանի վերջերս արած քաղաքական ընտրության հետ: Ասոցացման համաձայնագիրը և ԽՀԱԱԳ պայմանագիրն այլևս սեղանին չեն, և ներկայիս գործընկերությունն ու համագործակցության համաձայնագիրը համապատասխանաբար պետք է փոխարինել: Սա համալիր առաջադրանք է, որի համար անհրաժեշտ է պատշաճ ուրվագծում և կոնսուլտացիա, ցանկալի է, որ ավարտին հասցվի Վիլնյուսի գագաթնաժողովին ընդառաջ: Ակնհայտորեն դա պետք է որ միմյանց հետ համաձայնեցված արդյունք լինի, և մենք ակնկալում ենք շարունակել երկխոսությունը Երևանի հետ՝ մեր հարաբերությունների ապագա ձևաչափի վերաբերյալ»,- պարզաբանեց Շտեֆան Ֆյուլեի օգնական Պիտեր Ստանոն: Սակայն վերջինս չպարզաբանեց` ներկայումս կա՞ արդյոք երկխոսություն Երևանի և ԵՄ-ի միջև հնարավոր փաստաթղթի կամ դրա ուրվագծի շուրջ:
Հարցին, թե ԵՄ-ի հետ Հայաստանի ասոցացման վերաբերյալ Եվրոպական հանձնաժողովի դիրքորոշումը տարբերվո՞ւմ է արդյոք Եվրախորհրդարանից դիրքորոշումից, որտեղ արդեն քննարկվում է համաձայնագիր, որը ենթադրում է ՀՀ-ԵՄ գործակալությունների հետ համագործակցություն, որն ըստ էության քաղաքական համագործակցություն չէ, նա պատասխանեց, որ ԱՀ/ԽՀԱԱԳՊ-ն անհամատեղելի է Մաքսային միությանը Հայաստանի անդամակցության հետ թե՛ տեխնիկական, թե՛ իրավական պատճառներով, մինչդեռ ԵՄ ծրագրերին Հայաստանի մասնակցությունը հնարավոր է: Նա նշեց, որ ԵՄ-ն ցանկանում է շարունակել Հայաստանի հետ համագործակցությունը մի շարք ոլորտներում, ինչպիսին ժողովրդավարությունն է, լավ կառավարումը, մարդու իրավունքները, ճյուղային համագործակցությունը մի շարք ոլորտներում. սրանք համատեղելի կլինեն ներկայիս ընտրության հետ:
Անդրադառնալով ԱՀ տեքստի հրապարակման անհրաժեշտության մասին պնդումներին` Շտեֆան Ֆյուլեի օգնականն ասաց, որ դիտարկվում է այն հարցը, թե հնարավոր է արդյոք հրապարակել վերջնական տեքստը: Ըստ նրա` կան որոշակի իրավական հարցեր, որոնք պարտադիր պետք է լուծվեն:
