«Նախաձեռնող խմբի պահանջները մնում են նույնը: Ի սկզբանե եղել են մտահոգ մարդիկ, որոնք այս հարցը բարձրացրել են, բայց հակառակորդ կողմը չի լսել, նրանք չեն հրաժարվել իրենց մտադրություններից՝ ավիրել են կոթողի մի մասը: Հետագայում գտնվեցին մարդիկ, որոնք այդ հարցը բարձրացրեցին՝ ի դեմս Սաշուր Քալաշյանի, որը, կարելի է ասել, մեր երեք սերունդների մոհիկաններից է… Մենք էլ պարզապես չէինք կարող չաջակցել»,- «Առաջին լրատվական»-ի հետ զրույցում ասաց Շուշիի առանձնակի գումարտակի հրամանատար, «Նախախորհրդարանի» քարտուղարության անդամ Ժիրայր Սեֆիլյանը՝ «Ազատագրենք հուշարձանն օլիգարխից» նախաձեռնության բողոքի ակցիայի ընթացքում:
«Ես անձնապես չէի կարող այդ սերնդի ներկայուցուցչի ցավին ցավակից չլինել: Բնականաբար «Ծածկած շուկայի» պայքարը միայն հուշակոթողը վերականգնելու խնդիր չէ, որովհետև մեր երկրում բազմաթիվ այլ խնդիրներ կան. հակահայկական կառավարման համակարգի բացահայտման տարրերն օր օրի ցույց է տալիս այս պայքարը: Մենք մեր մատը դրել ենք վերքի վրա և օր օրի հասնելու ենք մեր նպատակին, այսինքն եթե կառուցել են՝ ուշ թե շուտ ապամոնտաժելու են այն հատվածը, որը պետք է ապամոնտաժվի»,- ասաց Սեֆիլյանը:
Մեր զրուցակիցը վստահություն հայտնեց, որ կփոխվի պայքարի մարտավարությունը: Նրա հավաստմամբ՝ հաղթանակի հասնելու գլխավոր գրավականը հետևողականությունն ու համառությունն է:
Արձագանքելով այն դիտարկմանը, թե փաստորեն քաղաքապետարանը, մշակույթի նախարարությունը այդ շինարարությունը համարում են ապօրինի, իսկ Ալեքսանյանը շարունակում է իր գործն անել, Ժիրայր Սեֆիլյանն ասաց․ «Սա ևս մեկ անգամ ապացուցում է, որ պետություն գոյություն չունի: Բայց մենք նույնիսկ քիչ ուժերով օլիգարխիկ և հանցագործ համակարգին կարող ենք պարտադրել մեր կամքը, որովհետև ճիշտը մեր կողմն է»:
Մեր զրուցակիցը նաև հավելեց, որ իրենց խնդիրը «ժողովրդին ժողովրդի դեմ» հանելը չէ․ «Հակառակորդն ընտրեց այդ մարտավարությունը, բայց մենք չէինք կարող նույնն անել: Հասկանում ենք այդ մարդիկ այնտեղ ինչ պատճառներով են եկել, անձնապես չեմ էլ մեղադրում՝ նրանք կախյալ են, գուցե ամեն մեկի պատմությունը մի մեծ ողբերգություն է, բայց քանի որ նրանք ևս մեր ժողովուրդն են, խնդիր չունենք ժողովուրդ ժողովրդի դեմ հանելու»:
