Ադրբեջանական haqqin.az կայքը սենսացիոն տեղեկատվություն է հրապարակել ԵԱՀԿ Մինսկի խմբի ամերիկացի նախկին համանախագահ Ջեյմս Ուորլիքի մտադրության մասին: Իհարկե, մենք հակված չենք «հալած յուղի» տեղ ընդունելու ադրբեջանական կայքերի տեղեկատվությունը և միշտ խիստ որոշակի վերապահումով ենք վերաբերվել Բաքվից եկող լրատվական արտահոսքերին: Այս դեպքում խնդիրն այն է, որ haqqin.az-ն իր հերթին հղում է անում Depiararat հայկական պորտալին:
Ինչևէ, եթե հավատանք հրապարակված տեղեկատվությանը, ապա Ուորլիքը խորհրդակցություններ է անցկացնում ԱՄՆ պատկան մարմինների հետ Ամերիկայի Հայկական ազգային կոմիտեի և Ամերիկայի Հայկական համագումարի դեմ դատական գործընթաց հարուցելու համար` այն հիմքով, որ այս լոբբիստական կառույցները ֆինանսավորում են ԼՂՀ իշխանություններին` այդպիսով խրախուսելով հայերին և վիժեցնելով ԼՂ կարգավորման գործընթացը:
Դժվար է հիշել մեկ այլ դեպք, երբ նախկին համանախագահներից մեկը հանդես եկած լինի նման պրովոկացիոն նախաձեռնությամբ: Նրանք բոլորը, որպես կանոն, աչքի են ընկել դիվանագիտական կոռեկտությամբ, և, անկեղծ ասած, դժվար է պատկերացնել, որ նման բան կարող է նախաձեռնել Ուորլիքը, ով եղել է ամենաակտիվ համանախագագներից մեկը և իր հրապարակային խոսքում և հայտարարություններում միշտ աչքի է ընկել անկողմնակալությամբ և չափավորությամբ:
Եթե ճիշտ է ադրբեջանական կայքի լրատվությունը, ապա ո՞րն է ամերիկացի դիվանագետի հակահայկական նախաձեռնության մոտիվը:
Արդյո՞ք նրա վրա ազդել են թուրքական ու ադրբեջանական քաղաքական և բիզնես շրջանակները, ինչպես դա տեղի է ունեցել նրա գործընկեր Մեթյու Բրայզայի դեպքում: Եթե դա այդպես է, ապա մտահոգության մեծ առիթ չունենք, որովհետև նման նախաձեռնությունները, որպես կանոն, սահմանափակվում են քարոզչական ձևաչափով և ավելի շատ ազդում են հեղինակների, քան Հայաստանի կամ հայերի իմիջի վրա:
Սակայն մտահոգիչ կլինի, եթե Ուորլիքի նախաձեռնության հետևում կանգնած լինի Թրամփի վարչակազմը` սրանով ազդարարելով իր նոր քաղաքականությունը մեր տարածաշրջանում և ԼՂ կարգավորման գործընթացում: haqqin.az-ը նման մի բան ակնարկել է` խոսելով Թրամփի նոր քաղաքականության և Ուորլիքի այս նախաձեռնության ներդաշնակության մասին, ինչպես նաև հավելելով, որ ամերիկացի դիվանագետի` հայկական կազմակերպությունների դեմ ծրագրած դատական գւրծընթացն արժանացել է պետքարտուղարի տեղակալ Ջոն Հեֆֆերնի հավանությանը:
Մեզ մնում է սպասել Ուորլիքի կամ ամերիկյան կողմի արձագանքին` այն հույսով, որ haqqin.az-ի տեղեկատվությունը կհերքվի:
