Ժիրայր Սեֆիլյանի և մյուսների դատավարությունն ընթանում է նույն սցենարով, ինչ «Սասնա ծռերի» երկու գործընթացները: Այսօր էլ դատական նիստերի դահլիճը լքել են փաստաբաններ Արա Զաքարյանն ու Նինա Կարապետյանցը, որովհետև նրանց պաշտպանյալներ Ժիրայր Սեֆիլյանը և Ներսես Պողոսյանը հեռացված են դատական նիստերից:
Ընթացող երեք դատավարությունները վերածվել են խեղկատակության, և իշխանություններն առաջին հերթին ու նաև ամբաստանյալները և նրանց պաշտպանները պարտավոր են վերացնել այս վիճակը:
Հատկապես «Սասնա ծռերի» զույգ գործերում դատավոր Արտուշ Գաբրիելյանը չի վերահսկում վիճակը՝ ակնհայտորեն պրոֆեսիոնալիզմի պակասի, դիլետանտիզմի հետևանքով: Եթե իշխանությունները շահագրգռված են արդարադատության իրականացմամբ, պետք է փոխեն այս դատավորին, սկսեն դատական նոր գործընթաց՝ «Սասնա ծռերի» երկու գործերը մեկ վարույթում միավորելու ճանապարհով: Դա թելադրված է ոչ միայն իրավական մոտիվներով, այլ նաև այն հանգամանքով, որ դատական և քրեակատարողական համակարգերն ակնհայտորեն չեն կարողանում «հատուկ ռեժիմով» սպասարկել երկու դատավարություն:
Փաստաբանները պետք է գնահատեն իրենց մասնագիտությունն ու արժևորեն դատավարական իրենց կարգավիճակը: Նրանք ոչ թե «ծռերի» խոսնակներն են, այլ մասնագետներ, ովքեր պարտավոր են նպաստել արդարադատության կայացմանը: Նույնը վերաբերում է ամբաստանյալներին:
Օրենքը հարգելով պետք է հասնել արդարադատության, ոչ թե աղմուկով և էպոտաժով: Երբ ամբաստանյալը ոտքի է կանգնում, հարգում է դատարանը, ոչ թե կոնկրետ դատավորի, նույն կերպ՝ երկրի օրհներգի նկատմամբ մեր ակնածանքը վերաբերմունք է ոչ թե իշխանության, այլ պետության հանդեպ:
Երբ քաղաքական դրդապատճառներով նախկինում կալանավորված Սասուն Միքայելյանը կամ Ալեքսանդր Արզումանյանը դատարանում ոտքի էին կանգնում, դրանից չէին դադարում ընդդիմադիր լինել: Հակառակը՝ նրանք ստեղծում էին այնպիսի մթնոլորտ, որպեսզի դատավարությունը կարողանան օգտագործել իրենց քաղաքական գաղափարները տարածելու համար:
Երբ մարդն արդար է լինում և ունենում է քաղաքական ասելիք, չի ընկնում ձևականությունների հետևից և իր վարքով նպաստում է արդարադատության իրականացմանը:
Լուսանկարը՝ Photolure-ի
