«Առաջին լրատվական»-ի տեղեկություններով՝ «ԱրմենՏել» ընկերության նորանշանակ տնօրեն Անդրեյ Պյատախինը պաշտոնը ստանձնելուց հետո ներքին աուդիտ է անցկացրել: Արդյունքում պարզվել է, որ ընկերության գրեթե բոլոր ստորաբաժանումներում խոշոր չարաշահումներ են կատարվել, այդ թվում՝ ֆինանսական յուրացումներ:
Պարզվել է, որ «ԱրմենՏելը» տարբեր ընկերությունների հետ գործարքների ընթացքում իր փաստաթղթերում մի քանի անգամ ավելի գործարքային գումարներ է ցույց տվել: Մինչդեռ տվյալ ընկերությունների փաստաթղթերում նույն գործարքների համար շատ ավելի փոքր գումարներ են եղել: Այս ներքին աուդիտի արդյունքները հիմա քննում է ԱԱԾ-ն: Իսկ թե ինչու է մասնավոր ընկերության չարաշահումների հետ կապված գործը քննում ԱԱԾ-ն՝ մեզ առայժմ չհաջողվեց պարզել:
Հիշեցնենք, որ «ԱրմենՏելի» նախկին տնօրեն Իգոր Կլիմկոն պաշտոնից ազատվել է պայմանագրի ժամկետի ավարտից 4 ամիս ավելի վաղ: Տեղեկություններ կային, որ նա ֆինանսական հսկայական չարաշահումներ է թույլ տվել, այդ պատճառով էլ վաղաժամ հեռացվել է պաշտոնից:
